Според Бербок, лекцијата од политиката на Германија кон Русија треба да биде дека „не треба повеќе да се ставаме во егзистенцијална зависност од која било земја што не ги дели нашите вредности“.
Шефицата на германската дипломатија Аналерна Бербок повика на поголема претпазливост во трговските односи со Кина и предупреди дека најголемата европска економија мора да научи од колапсот на односите со Русија.
„Мораме да ги усогласиме нашите политички, но пред сè нашите економски односи со Кина што постојат денес“,
изјавила Бербок за весникот „Зидојче цајтунг“, пренесува бугарската новинска агенција БГНЕС.
Според Бербок, лекцијата од политиката на Германија кон Русија треба да биде дека „не треба повеќе да се ставаме во егзистенцијална зависност од која било земја што не ги дели нашите вредности“.
Германија се соочува со енергетска криза бидејќи Русија ги прекина испораките на гас, од кои земјата е во голем дел зависна што предизвика пораст на цените.
Инаку, Кина е клучен трговски партнер на Германија, особено за нејзината автомобилска индустрија.
Сепак, односите меѓу двете земји се влошија поради цврстата политика на Кина околу мерките со ковид-пандемијата, ескалацијата на тензиите околу Тајван и загриженоста за прашањата за човековите права во регионот Синџијанг во кој доминираат Ујгурите – муслиманско население во Кина.
За време на деловниот самит во вторникот канцеларот Олаф Шолц ја посочи Кина како пример на земја со која Германија треба да одржува деловни односи.
„Не треба да се откачиме од некои земји, треба да продолжиме да работиме со одделни земји – и јас ќе кажам експлицитно, исто така и со Кина“,
рече Шолц.
Германските медиуми објавија дека Шолц планира да ја посети Кина во ноември, што ќе биде прво патување на лидер на Г-7 во земјата од почетокот на пандемијата.
Бербок рече дека не се залага за целосен прекин, туку за отворање алтернативни пазари, диверзификација и управување со ризик.
Шолц, исто така, повика да се разгледа остатокот од Азија, наведува БГНЕС.
Сепак, министерката за надворешни работи на Германија, кога станува збор за односите со Кина, зазеде поостар тон во однос на учеството на кинескиот бродски гигант „Коско“ во терминалот за контејнери во Хамбург.
„Со каква било инвестиција во германската стратегиска инфраструктура треба да се запрашаме што би можело да значи тоа доколку Кина се сврти против нас“,
рекла шефицата на германската дипломатија.