Станува збор за најсмртоносниот напад во мирновременски услови во Белгија, кој се случи на 22 март 2016 година и беше дел од бранот напади во Европа поврзани со Исламската држава. Меѓу осудените е и Салах Абдеслам, кој веќе отслужува доживотна затворска казна без помилување во Франција за неговата улога во нападите во 2015 година во париски кафулиња, театарот Батаклан и францускиот национален стадион. Во нападите во Париз загинаа 130 луѓе
Судот во Брисел прогласи шестемина обвинети за виновни за масовно убиство во терористички напад, по повеќе од седум години од самоубиствените бомбашки напади на аеродромот и метро-станицата во белгиската престолнина, во кои загинаа 32 лица, а стотици други беа повредени, пренесуваат светските медиуми.
По долго судење и 19 дена расправа на поротата, судот во Брисел денеска ја соопшти пресудата, пишува Би-би-си.
Станува збор за најсмртоносниот напад во мирновременски услови во Белгија, кој се случи на 22 март 2016 година и беше дел од бранот напади во Европа поврзани со Исламската држава, наведува Асошиејтед прес.
Меѓу осудените е и Салах Абдеслам, кој веќе отслужува доживотна затворска казна без помилување во Франција за неговата улога во нападите во 2015 година во париски кафулиња, театарот Батаклан и францускиот национален стадион. Во нападите во Париз загинаа 130 луѓе.
Врската во двата напади, во Париз и во Брисел, беше мрежата на Исламска држава, потсетува регионалниот сервис на Радио Слободна Европа, пренесувајќи ја веста за пресудата.
Во завршницата на најголемиот судски процес во историјата на белгиското правосудство, главниот судија ги именуваше жртвите пред да ги прочита одлуките и објаснувањата на дванаесетчлената порота.
Во случајот им се судеше на вкупно десет обвинети. Двајца обвинети, по потекло од Тунис и Руанда, се ослободени од обвиненијата за убиство, но се осудени за учество во терористички активности, заедно со другите шест обвинети. Последните двајца, браќата Смаил и Ибрахим Фариси, се ослободени од сите обвиненија, пренесува Би-би-си.
За казната ќе се одлучува во посебен процес, но не пред септември оваа година
Нападите кои се случија во утринските часови на бриселскиот аеродром и на централната линија на метрото во Брисел длабоко го потресоа градот – каде се наоѓаат седиштата на Европската унија и на НАТО. Покрај 32 загинати, стотици други беа ранети или претрпеа тешки психички трауми.
Поротата направи јасна врска меѓу нападот и екстремистичката идеологија на Исламската држава и утврди дека напаѓачите очигледно сакале да внесат страв и немир во белгиското општество.
Поротниците утврдиле и дека имало јасна убиствена намера и умисла, пренесуваат медиумите.
Поротата заклучи дека на нападите може да им се припишат уште четири смртни случаи, вклучително и на еден преживеан кој подоцна си го одзеде животот поради психички трауми и на друг кој морал да го прекине лекувањето од рак поради повредите здобиени во нападот, наведуваат медиумите.
Абдеслам беше единствениот преживеан од екстремистите на Исламската држава кои го нападнаа Париз во ноември 2015 година. По неколку месеци во бегство, тој беше фатен во Брисел на 18 март 2016 година. Се верува дека неговото апсење можеби ги поттикнало другите членови на ќелијата на Исламската држава да побрзаат со извршување на плановите за напад на белгиската престолнина.
Мохамед Абрини, пријателот од детството на Абдеслам, роден во Брисел, кој го напушти аеродромот откако неговиот експлозив не се активира, исто така е осуден за терористичко убиство на судењето во Брисел.
Усама Атар, идентификуван како можен организатор на смртоносните напади на Париз и Брисел, е осуден за терористичко убиство во отсуство.
Се верува дека тој е убиен во последните месеци од борбите против Исламската држава во Сирија и Ирак.