Министерот уверува дека што и да се случи со производството на Електрани на Северна Македонија (ЕСМ) и со енергетскиот систем, граѓаните никогаш нема да плаќаат повеќе од она што сега го издвојуваат за сметките за струја
Нема да има драстично зголемување на цената на електричната енергија од 1 јануари следната година, а можни се и „поместувања во надолна линија“, вели министерот за економија Крешник Бектеши во интервју за „Дојче веле“.
Министерот уверува дека што и да се случи со производството на Електрани на Северна Македонија (ЕСМ) и со енергетскиот систем, граѓаните никогаш нема да плаќаат повеќе од она што сега го издвојуваат за сметките за струја.
„Нема да има драстично зголемување на цената од 1 јануари, можни се и поместувања во надолна линија. Сѐ зависи од тоа што ќе утврди Регулаторната комисија откако ќе се направат соодветните анализи и проекции и, адекватно на тоа, ако е потребно ќе биде донесена соодветна одлука од страна на Владата. Согласно нашите проекции и разговорите што ќе ги имаме во Економскиот совет, можам да кажам дека кризата нема да биде на товар на граѓаните, на домаќинствата и на малите потрошувачи. Што и да се случи со производството на ЕСМ, што и да се случи во енергетскиот систем, граѓаните никогаш нема да плаќаат повеќе од она што моментално плаќаат. Јас ги имам пресметките колку би можела да изнесува таа и тврдам дека зголемувањето нема да биде на товар на граѓаните“,
вели Бектеши.
Во однос на инфлацијата, според министерот, ценовниот раст во земјава главно произлегува од фактори на страната на понудата, односно од порастот на цените на храната и енергијата како резултат на подолготрајниот и посилен раст на увозните цени поради војната во Украина и санкциите воведени кон Русија.
„Базичната инфлација во Република Северна Македонија бележи силен раст оваа година, во однос на претходните години, растот на домашните цени има исклучиво влијание од растот на цените во земјите од кои го вршиме увозот. За да го ублажиме притисокот од растот на увозните цени, Владата на Република Северна Македонија во почетокот на март оваа година донесе мерка за ограничување на трговската маржа на основните прехранбени производи, која важи до крајот на оваа година. Дополнително на тоа, Владата презеде натамошен чекор на почетокот на ноември оваа година кон домашните производители на основните прехранбени производи, за субвенционирање на електричната енергија во нивното производство, сѐ додека трае кризната состојба во непречено снабдување со електрична енергија“,
истакнува Бектеши.
Во моментов стратегиски подобра одлука е да се купи електрична енергија отколку да се произведува, тврди министерот прашан околу неработењето на клучните електроенргетски капацитети поради што државата увезува струја.
„За одржување на кондицијата и флексибилноста на електроенергетскиот систем потребно е стратешко планирање на краток, среден и долг рок и донесување на соодветни стратешки одлуки. Во претходниот период за жал не биле преземени соодветни одлуки и тоа што е пропуштено во моментов се одразува на состојбите. Цените на берзите во ноември се движат од 170 до 230 евра за мегават-час, што релативно се совпаѓа и со цената на енергијата од ТЕЦ ‘Неготино’ од една страна, а од друга страна стратешки подобра одлука е да се купи енергија по овие цени сега, отколку да се користи хидропотенцијалот од големите хидроелектрани, со оглед дека претстои зимски период во кој цените на берзите очекувано е да имаат нагорен тренд“,
вели министерот за економија.
Целото интервју на министерот за економија, Крешник Бектеши можете да го прочитате ТУКА.