Иако од СДСМ првично доаѓаа најави дека со МТСП, по разрешувањето на министерката Мизрахи, ќе раководи дополнителната заменик-министерка Шкријељ, поради тоа што се работи за техничка влада, таквото решение се покажа како законски неизводливо
Редовниот заменик-министер за труд и социјална политика Ѓонул Бајрактар од Демократската партија на Турците, најверојатно, ќе раководи со Министерството за труд и социјална политика (МТСП) до изборот на новата влада, по изборите на 12 април.
По разрешувањето на техничката министерка Рашела Мизрахи и одлуката на ВМРО-ДПМНЕ да не номинира нов кадар за оваа функција, во МТСП и во Владата уште се прават анализи на законските можности за раководење со овој ресор. Конечното решение, велат од МТСП, ќе се знае откако одлуката за разрешувањето на Мизрахи ќе биде објавена во „Службен весник“, со што ќе стапи во сила. Сепак, досегашната анализа упатува на тоа дека решението треба да се бара во Законот за организација на органите на државна управа, а не во Законот за Владата, каде што, како што се посочува, не се предвидени ситуации како таа што се создаде по разрешувањето на Мизрахи. Такви решенија нема ниту во Изборниот законик, каде што, исто така, е уреден концептот на т.н. пржинска влада.
Законски решенија
Затоа, пак, Законот за организација на органите на државната управа предвидува дека заменик-министерот го заменува министерот кога тој е отсутен од кои било причини.
Иако од СДСМ првично доаѓаа најави дека со МТСП, по разрешувањето на министерката Мизрахи, ќе раководи дополнителната заменик-министерка Санела Шкријељ, поради тоа што моментно функционира техничка влада, таквото решение се покажало како законски неизводливо. Затоа раководењето со овој владин ресор го презема редовниот заменик-министер кој дојде на функцијата во јуни 2018 година. Тогаш владата на СДСМ помина низ реконструкција, а Бајрактар стана заменик-министер откако пратеникот на ДПТ, Јусуф Хасани, ја напушти коалицијата на ВМРО-ДПМНЕ и премина во коалицијата на СДСМ.
ВМРО-ДПМНЕ реши да не номинира нов технички министер за труд и социјална политика по разрешувањето на Мизрахи. Тоа место, практично, веќе не може да се пополни затоа што парламентот е распуштен и не може веќе да заседава, а најмалку да избира членови на Владата.
Нухиу повторно ќе биде на чело на МВР
Бајрактар, и без разрешувањето на Мизрахи, ќе го преземеше раководењето со МТСП, но тоа немаше да биде како сега, на самиот почеток на изборната трка, туку ќе требаше да се реализира по изборното финале. Како што е предвидено со законите за избори и за влада, по завршувањето на парламентарни избори, од функциите се повлекуваат техничките министри од редовите на опозицијата, поточно министрите за внатрешни работи и за труд и социјална политика. Потоа, до изборот на новата влада, со МВР и МТСП раководат редовните заменик-министри. Според тоа, во МВР, по повлекувањето на Наќе Чулев, таа позиција повторно ќе ја преземе сегашниот заменик-министер од редовите на ДУИ, Агим Нухиу. Тој го раководеше МВР и по последните избори во 2016 година, пред кои првпат се формираше техничка влада.
ВМРО-ДПМНЕ во предизборието останува со член помалку во техничката влада, откако во саботата рано наутро (15 февруари) беше разрешена Мизрахи, која беше избрана за министерка на 3 јануари годинава. Најоптимален термин за избор на новата политичка влада, што би следувала по изборите на 12 април, е некаде кон крајот на мај или почетокот на јуни.