Лидерите на Велика Британија, Канада и на Соединетите Американски Дражави во посебни изјави велат дека разузнавачките информации со кои располагаат сугерираат дека украинскиот патнички авион, кој падна близу Техеран, бил урнат од ирански проектил, најверојатно по грешка.
Премиерот на Канада, Џастин Трудо, и премиерот на Велика Британија, Борис Џонсон, повикаа на целосна и детална истрага за несреќата, во која загинаа сите 176 патници и членови на екипажот на летот.
Иран веќе ја отфли тезата дека падот на авионот се должи на проектил истрелан од иранската противвоздушна одбрана.
Што точно велат Трудо, Џонсон и Трамп
Шефот на канадската влада Џастин Трудо денеска изјави дека „добил разузнавачки информации“ од повеќе извори кои сугерираат дека авионот е соборен со ирански земја-возух проектил. Додаде и дека е можно тоа да се случило ненамерно.
„Ова ја засилува потребата за целосна истрага. Канаѓаните имаат прашања и тие заслужуваат одговори“,
изјави Трудо.
Премиерот на земјата која загуби 63 свои државјани, сепак, вели дека е премногу рано за да се припише вина некому или, пак, да се извлекуваат заклучоци. Овој „дипломатски“ одговор го даде на прашањето – колкава одговорност смета дека имаат САД за падот на авионот, имајќи ги во предвид тензиите во регионот.
И според британскиот премиер Борис Џонсон, има „куп информации“ дека украинскиот авион, кој падна брзо по полетувањето во Техеран, е урнат од ирански проектил.
„Сега има куп информации дека авионот бил срушен со проектил земја-воздух. Можно е да било ненамерно. Работиме со Канада и нашите меѓународни пријатели. Сега мора да има целосна и транспарентна истрага“,
изјави британскиот премиер Борис Џонсон.
Претседателот на САД, Доналд Трамп, пак, изјави дека се сомнева дека авионската несреќа во Иран е последица на механички проблеми, туку дека „некој од другата страна можеби направил грешка“.
„(Падот на авионот н.з.) нема никаква врска со нас. Тој леташе во опасна зона. Тие можеби направиле грешка. Некои луѓе велат дека проблемот бил механички. Лично, мислам дека тоа воопшто не е во прашање“,
изјави американскиот претседател Доналд Трамп.
За разлика од официјалната воздржаност на Трамп, повеќе американски медиуми објавуваат брифинг од упатени извори дека американските служби се сигурни дека авионот бил срушен со два проектила од руско производство (SA-15). Забележан бил ирански радарски сигнал кој се „заклучил“ на авионот, како и инфрацрвени траги за лансирање на два проектили непосредно пред падот на авионот.
Нема логика – вели шефот на иранското цивилно воздухопловство
Поткрепа за тезата, дел од американските медиуми најдоа и во видео запис, кој иако е објавен, сепак, не е проверен за неговата автентичност. Светската мрежа Си-Ен-Ен е една од првите глобални мрежи која се одлучи да го објави и покрај резервите.
На видеото може да се види и слушне екплозија во воздух, но не може да се препознае ниту кој објект е погоден ниту пак со што.
Единственото проверено видео од падот на авионот кое до овој момент го објавуваа медиумите беше од последните неколку секунди пред падот на леталото. Освен големата екплозија пред падот, на него може да се препознае дека авионот е во пламен и во воздух.
Шефот на иранското цивилно воздухопловство ги отфрли обвинувањата дека Иран по грешка го урнал украинскиот авион, кој се сруши набргу по полетувањето од Техеран.
„Ако ракета или проектил погодат авион, тој ќе биде во слободен пад. Како е можно авион да биде погоден од ракета или проектил и потоа пилотот да се обиде да се врати на аеродромот“,
изјави Али Абеџедех за Си-ен-ен.
Последниот развој на настаните, сепак, се чини дека ја омекна и тврдата позиција на Техеран во однос на истрагата за падот на авионот. За разлика од вчера кога Иран одбиваше да соработува со САД, информациите сега велат дека е упатено барање до производителот на авионот, американски „Боинг“, да учествува во работата на комисијата што ќе ги истражува причините за падот. Не е ислучено Техеран да побара помош од Канада или од Франција, особено за декодирањето на црните кутии.
Украинскиот авион кој леташе од Техеран за Киев се урна завчера, брзо по полетувањето. Леталото било старо само три години и пред неколку дена поминало редовен сервис. Во несреќата загинаа сите 176 патници и членовите на искусниот екипаж.
Само неколку часа пред летот Иран истрла десетици проектили земја-земја кон две американски бази во Ирак, како одмазда за убиството на генералот Сулејмани.