На последниот брифинг со новинари, Ескобар, кој заминува од позицијата заменик-помошник државен секретар за Европа и Евроазија, порача дека очекува Северна Македонија да продолжи на патот на евроинтеграции без оглед на резултатите од денешните избори
По три години, Габриел Ескобар заминува од позицијата заменик-помошник државен секретар за Европа и Евроазија. На последниот настап пред новинари, Ескобар изјави дека сè уште се надева на напредок во дијалогот меѓу Белград и Приштина и, како што рече, целосна имплементација на Охридскиот договор кој треба да резултира со нормализација на односите. Ескобар не заборави да го спомене и остатокот од Западен Балкан, а беше јасен и за очекувањата на Вашингтон од земјава по завршувањето на денешните двојни избори.
„За остатокот од регионот, исто така, сакам да кажам дека една од работите што сме многу среќни што ја постигнавме е тоа што ние – што неколку земји од Западен Балкан се солидно на патот кон евроатлантските интеграции, особено оние кои се НАТО членки – Албанија, Северна Македонија и Црна Гора, кои се целосно ангажирани во целиот процес на пристапување кон Европската Унија. Уверен сум и се надевам дека без оглед на изборите во Северна Македонија, тој пат кон Европа ќе продолжи“,
изјави Габриел Ескобар.
Иако заминува, тој е уверен дека политиките и програмите што во изминатите години биле поставени во Западен Балкан ќе му помогнат на регионот и во делот на помирувањето и во делот на евроатлантска интеграција на земјите.