Спроведувањето на процесот на ветинг беше едно од предизборните ветувања на Арсовска
Градоначалничката на Град Скопје, Данела Арсовска, најави дека веќе е започната постапката за ветинг на поставените директори на јавните претпријатија, а потоа процесот ќе продолжи и со раководителите на останатите сектори, информираат од Град Скопје.
„Ќе има нулта толеранција за корупцијата. Ова е системска мерка за елиминирање на можностите за корупција во рамки на градот и спречување на какви било судир на интереси. Денеска овој процес започна со директорите на јавните претпријатија, а ќе продолжи со раководителите на секторите“,
изјави Арсовска по состанокот со директорите на јавните претпријатија.
Секој од директорите веќе пополни анкетен лист до Државната Комисија за спречување на корупција и потпиша изјавата за непостоење на судир на интереси во нивната работа.
„Град Скопје на овој начин започна активно да работи на подобрување на интегритетот на локалната самоуправа со цел значително да се намалат и отстранат сериозните прекршувања на работниот процес поврзани со корупцијата. Ова е строг процес на проверка за да се утврди соодветноста за вработување или унапредување на работната позиција“,
додаде Арсовска.
Спроведувањето на процесот на ветинг беше едно од предизборните ветувања на Арсовска.
Таа наполемена и дека Градот Скопје ќе продолжи со „спроведување на новата политика на интегритет за јакнење на етичкото и професионално постапување во градската администрација“.