Градот Скопје, како што најави Арсовска, ќе поднесе кривична против градоначалникот на Општина Ѓорче Петров, Александар Стојковски, министерот за транспорт и врски Благој Бочварски, претседателот на Советот на Општина Ѓорче Петров, Ленче Нелоска, и Весна Андреецска, која е вработена во Министерството за транспорт и врски
Советот на Општина Ѓорче Петров, без согласност од Град Скопје, викендов на седница изгласал измени на Деталниот урбанистички план (ДУП) со кој дозволените градби на улицата „Ацо Шопов“ се драстично зголемени од 5 ката плус поткровје, на 20 ката плус поткровје, информира денеска на прес-конференција градоначалничката на Скопје, Данела Арсовска.
„На17.02, в сабота, на вонредна седница на Советот на Општина Ѓорче Петров, спротивно на сите процедури, со кршење на повеќе закони, изгласан е Детален урбанистички план со кој се предвидува изградба на бетонски монструм составен од 50 згради согласно планот C3 16, каде што е предвидена изградба на 240 000 квадратни метри станбена површина од 50 згради од кои една приземје 20 плус поткровје, една приземје 17 плус поткровје, четири 14 приземје плус поткровје, две приземје 12 плус поткровје, шест деветкатници плус приземје плус поткровје, седум седумкатници плус приземје плус поткровје и уште десетина помали згради. Сепак, она што повеќе загрижува од сè за овој детален урбанистички план кој е изгласан на Советот во сабота е изградбата на три индустриски деловни капацитети од хемиската индустрија и тоа на површина од преку 157 000 квадратни метри“,
посочи Арсовска.
Според Арсовска, согласност за ДУП имало само од Агенцијата за катастар на недвижности, а Град Скопје дал две негативни мислења.
„Да бидам попрецизна, за овој план претходно во два наврати Градот Скопје дал негативно мислење и забелешки кои Општината (Ѓорче Петров) била должна да ги отстрани и повторно да го испрати ДУП на одобрување во Градот. По две негативни мислења градоначалникот Александар Стојковски одлучил, кршејќи го законот, да го прескокне Градот Скопје и Планот како конечен да го испрати на одобрување во Министерството за транспорт и врски. Во ова Министерство верувам дека сите знаете дека министерува во овој момент Благој Бочварски, човек кој е поставен од страна на Зоран Заев. Овој план кој е нелегално ставен на гласање на Советот на Општина Ѓорче Петров нема добиено согласност од повеќе институции со што би можела да се потврди неговата усогласеност со законите и стандардите за истиот, а кои согласности и мислења се обврзувачки елементи на постапката за носење на самиот Детален урбанистички план (ДУП)“,
рече градоначалничката на Град Скопје.
Градот Скопје, како што најави Арсовска, ќе поднесе кривична против градоначалникот на Општина Ѓорче Петров Александар Стојковски, министерот за транспорт и врски Благој Бочварски, претседателот на Советот на општина Ѓорче Петров, Ленче Нелоска, и Весна Андреецска, кој е вработена во Министерството за транспорт и врски.
Од Уставниот суд, пак, ќе побара со времена мерка да ја запре примената.
„Нема да дозволиме покрај овие бетонски зданија и изградба на три индустриски објекти од хемиската индустрија како потенцијални катастрофи да се изградат во општина Ѓорче Петров. Ова е недозволиво и ниту јас ниту администрацијата на Градот Скопје нема да дозволиме истото да помине неказнето. Нема да дозволиме ниту еколошка, ниту безбедносна катастрофа да му се случи на градот Скопје и да се издигне вакво здание сред град на местото каде што има три населени места“,
децидна беше Арсовска.