Во кривичната пријава што ја поднесе Град Скопје, освен од правното лице, одговорност ќе се бара и од генералниот директор на Цементарницата, Борис Хрисафов, кој, како што велат од Градот, не се придржувал до обврските од А-интегрираната дозвола која ја поседува фабриката што, пак, довело до надминување на максимално дозволените граници на испуштање штетни гасови во воздухот
Откако минатата недела градоначалничката Данела Арсовска најави, од Град Скопје информираат дека денеска официјално е поднесена кривична пријава против Цементарницата „Титан – Усје“ поради загадувањето на воздухот предизвикано од испуштање на поголема концентрација на ПМ 10 честички од дозволеното.
„Поднесената кривична пријава е согласно членот 234 од Кривичниот законик – тешки дела против животната средина и природа, во врска со член 218 од истиот закон насловен како ‘Загадување на животната средина и природа’. За овие дела е предвидена затворска казна“,
се вели соопштението од Градот Скопје испратено до медиумите.
Во кривичната пријава, како што додаваат од Град Скопје во писменото соопштение, освен од правното лице, одговорност ќе се бара и од генералниот директор Борис Хрисафов, кој, како што велат, не се придржувал до обврските од А-интегрираната дозвола која ја поседува „Усје“. Тоа, како што додаваат, довело до надминување на максимално дозволените граници на испуштање на штетни гасови во амбиенталниот воздух.
„Имено, цементарницата ‘Титан – Усје’ испуштала значително поголема концентрација на ПМ 10 честички од котлите за загревање кои работеле на мазут, наместо на природен гас, при мерењата извршени на 3 и 4 јануари. Наместо дозволениот максимум од 50 микрограми на кубен метар, од оџакот се испуштале 121 микрограми на кубен метар секој час. Исто така, забележано е зголемување на испустот на азотни оксиди за најмалку два пати, односно наместо дозволените 350 микрограми на кубен метар, се испуштале 711 микрограми на кубен метар секој час. Производниот процес на цементарницата ‘Титан – Усје’ е непрекинат и се одвива секој час од секој ден во текот на годината“,
се наведува во соопштението од Градот Скопје.
Од Градот упатија и апел до Основното јавно обвинителство (ОЈО) Скопје темелно да ги истражи наводите и по кривичната пријава да постапи соодветно бидејќи, како што велат, недозволиво е скопјани да бидат жртви на профитите на неколкумина кои со децении го трујат главниот град.
Во меѓувреме, вчера од Државниот инспекторат за животна средина (ДИЖС) информираа дека „Усје“ ги исполнило задолженијата кои му беа одредени од страна на Инспекторатот во врска со емисијата на штетни гасови од двата котли за греење во Цементарницата. Во соопштението од ДИЖС се вели дека фабриката почнала да користи природен гас, наместо мазут, како гориво во двата котли за парно греење.
Од Инспекторатот претходно соопштија дека доколку се утврди оти Цементарницата „Усје“ не постапува согласно решението од ДИЖС, ќе биде поднесено барање за поведување на прекршочна, односно кривична постапка пред надлежните органи и ќе отпочнат постапка за одземање на добиените дозволи и овластувања на фабриката.
Ова следуваше откако скопската градоначалничка најави дека ќе поднесе кривична пријава до „Усје“ поради резултатите од мерењата во фабриката кои покажеле трипати поголеми количини испуст на гасови од дозволеното.