Градоначалничката на Град Скопје, Данела Арсовска, го разреши в.д. директорот на скопската зоолошка градина, Кристијан Стаменов, поради, како што велат од Град Скопје, скандалот кој денес ја потресе јавноста.
Повеќе медиуми денеска јавија дека во ЗОО Скопје се убиени 10 коњи за храна на лавовите. Директорот Кристијан Стаменов, за САКАМДАКАЖАМ.МК денеска изјави дека станува збор за животни кои ги добиле од Агенцијата за запленет имот, при акции за фаќање дрвокрадци и шверцери. Добиле 16 коњи, а 10 од нив биле болни и затоа е решено тие да бидат заклани. Постапката, кажа тој, е согласно законите и правилата за третман на животни, а известена е и Агенцијата за храна и ветеринарство.
„Културна, образовна и научна се основните дејности на ЗОО Скопје, а нејзина основна цел е да ги чува, одгледува и презентира живите експонати и истите да ги направи достапни за пошироката јавност. Личната одлука превземена од страна на директорот не соодветствува со основните заложби за хумано чување и одгледување на животни и за истото мора директорот да понесе одговорност, поради што истиот се разрешува“,
се вели во соопштението на Град Скопје, од каде се оградуваат од индивидуално преземените дејствија на директорот.