Арсовска го пријави Славески во полиција поради микрофонот од говорницата на Советот

Службите од Градот им даваа изјава на полицајците кои правеа записник дека микрoфонот е сопственост на Градот и со тоа што го нема, извршена е кражба и оштетена е институцијата

Градоначалничката на Скопје, Данела Арсовска на денешната седница на Советот на Град Скопје повик полиција и го пријави претседателот на Советот Трајко Славески дека го украл микрофонот кој стои на говорницата во пленарната сала на Советот на Градот, пишува „СДК.мк“.

Службите од Градот им даваа изјава на полицајците кои правеа записник дека микрoфонот е сопственост на Градот и со тоа што го нема, извршена е кражба и оштетена е институцијата.

Славески на денешната седница го зема микрофонот од говорницата и го стави под неговата маса откако службите не му го вратија копчето со кое може да го вклучува и исклучува микрофонот на говорницата во пленарната сала на Советот доколку советниците не се придржуваат на дневниот ред и Деловникот за работата.

По ова избувна жестока расправија меѓу Славески и градоначалничката Арсовска, која не штедеше навредливи зборови кон претседателот на Советот на Градот, кого го нарече „Хитлер“, „деспот“, „тиранин“ и „крадец“.

„Г. Хитлер не ви доликува да го правите овој циркус во овој Совет. Навистина е недолично тоа што го правите. Прво го кршите Уставот потоа сте ситен лопов и сте човек којшто краде и не е во ред тоа што го правите. Крадете. Тој микрофон е сопственост на Град Скопје и на службите“,

му се обрати Арсовска на Славески.

Повторно еруптираше нетрпеливоста меѓу Арсовска и Славески: „Хитлер“, „деспот“, „тиранин“ ечеше преку микрофонот „бубачка“ на скопската градоначалничка  

Претседателот на Советот на Град Скопје, Трајко Славески пред почетокот на денешната седница и утврдувањето на дневниот ред, јавно го повика Инспекторатот за локална самопурава да интервенира откако градоначалничката на Скопје му го одзеде копчето за вклучување и исклучување на микрофините на советничката говорница.

Пред две седници, во Советот на Град Скопје беше поставен нов систем со кој претседателот на Советот веќе нема копче со кое може да интервенира односно да ги исклучува советниците кои не се придржуваат до точките дневниот ред и говорат на теми надвор од нив. На Славески му беше одземена оваа можност откако тој ѝ го исклучи микрофонот на Арсовска пред три седници бидејќи таа го критикуваше и го повикуваше лидерот на ВМРО-ДПМНЕ, Христијан Мицкоски.

Славески бара од Инспекторатот за локална самоуправа да интервенира оти Арсовска му го одзеде копчето за микрофоните на говорницата