Коментарот на заменик-претседателот на Движењето Беса, кажан во емисијата „360 степени“ на ТВ Алсат, се однесува на Христијан Мицкоски, а во контекст на актуелните и идни односи меѓу Беса и ВМРО-ДПМНЕ
Според Хоџа, колку повеќе ВМРО-ДПМНЕ се занимава со ДУИ, толку „се убедуваме дека не е прекината важноста на соработка на овие две партии“
Заменик-претседателот на Движењето Беса, Арјанит Хоџа, вели дека не е вистина оти имаат некаков договор со ВМРО-ДПМНЕ. Тоа беше одговор на Хоџа на новинарската констатација дека двете опозициски партии си намигнуваат и се штедат една со друга во јавните настапи.
Хоџа за себе смета дека е меѓу ретките политичари што не ги штедел од критики ВМРО-ДПМНЕ и нејзиниот лидер. Според него, колку повеќе ВМРО-ДПМНЕ се занимава со ДУИ, толку „се убедуваме дека не е прекината важноста на соработка на овие две партии“.
„Ние моментално немаме ништо заедничко со ВМРО-ДПМНЕ освен опозициските позиционирања што ги имаме. Тоа што е комуникација е како со сите политички субјекти. Немаме координација за заеднички постапувања, а има прашања за кои сè уште мислиме дека имаме спротивни ставови. На пример, за мене како политичар, е апсурдно еден опозициски лидер да му се спротивстави на Али Ахмети со објавување фотографија со униформа. Бидејќи немаме потреба сега, имајќи ја униформата на НАТО, да се враќаме во 2001 г. и да се потсетуваме на сето тоа што се случило. Затоа, ви велам, не е вистина дека ние ја штедиме ВМРО, за проблемите или нивниот погрешен пристап, јавно го кажавме тоа и ќе го кажуваме и понатаму“,
коментираше заменик-лидерот на Беса.
Според Хоџа, „ако некој мисли дека Беса има стратешки партнер, тоа е погрешно, бидејќи во нашата историја сме докажале дека единствен стратешки партнер се само албанските гласачи“.
Прашан како ќе се постави Беса ако утре биде во позиција да соработува со ВМРО-ДПМНЕ, со оглед на негативниот став на оваа партија за уставните измени, заменик-претседателот на Беса одговори:
„Визијата на Движењето Беса за интегрирањето на земјата во ЕУ е визија без алтернатива. И ако наредниот наш партнер, кој и да е, не можам да прејудицирам, ако велите дека може да биде ВМРО-ДПМНЕ, ако тие не ги споделуваат овие вредности, не мора да бидеме во Влада. Ние не влегуваме во Влада само за да пополниме нечии бројки. Ако влеземе во Влада, ќе влеземе за ситуации и решавање на прашања од стратешки аспект. Стратешкиот момент на земјата е интеграцијата во ЕУ. Ние ќе соработуваме со сите тие што сакаат да ја исполнат таа визија.“