Аријанит Хоџа денеска ја основа Европска демократска партија

Викенд на формирање нови политички партии на македонската политичка сцена – Аријанит Хоџа денеска го одржува основачкото собрание на неговата Европска демократска партија, а утре Изет Меџити од „oгнените“ ја формира партијата Демократско движење

Европска демократска партија е новата партија на македонската политичка сцена чиј лидер ќе биде доскорешниот заменик-претседател на Движењето Беса, Аријанит Хоџа. Партијата денеска ќе има основачко собрание.

Пред почетокот на настанот, Хоџа изјави дека денеска во Македонија се отвара нова страница на политичко дејствување.

„На политичката сцена отвораме нова страница, страница која ќе придонесе за демократизацијата и имплементирање на европските вредности на политичката сцена. Знаеме дека во моментов може да изгледа апсурдно, дека може да изгледа нереално, но убедени сме дека од овој политички моментум, па сè до случувањата во иднина, ова ќе биде една авангарда, односно ќе биде најпозитивната политичка сила која ќе придонесе за иднината на државата и долгорочноста на процесите што нè очекуваат, а особено за интегрирање на земјата во Европската Унија“,

рече Хоџа.

Хоџа рече дека новата партија ќе дејствува конструктивно во Собранието, а првата битка се уставните измени.

„Пред нас првиот чекор, односно првата битка е уставните измени. Значи, без да има епилог во делот на уставните измени, ние не можеме да кажеме како ќе се одвива политичката сцена. Нормално очекуваме да поминат уставните измени, бидејќи тоа е отворање на вратата за влегување во ЕУ. Доколку не поминуваат, тогаш државата влегува во едно сценарио каде што навистина европската перспектива има потреба од политички сили што треба да се соединат и да не оставаме државата да остане во рацете на политичари што сакаат да ја изолираат“,

изјави тој.

Коментирајќи ја вчерашната посета на косовскиот премиер Албин Курти тој истакна дека државава треба да се дистанцира од Србија поради руското влијание во регионот.

„Македонија треба што подалеку да стои од Србија, односно од руското влијание во регионот. Така да, индиректно е дадена порака и во самата опозиција и луѓето што го пречекаа Курти таму дека треба да бидат внимателни да не работат под диктат на политички структури што индиректно или директно работат за Русија, односно за изолирање на државата и за попречување на патот на државата кон ЕУ“,  

смета Хоџа.

Аријанит Хоџа до неодамна беше заменик-претседател на Движењето БЕСА, но најави дека ќе се повлече од партијата и ќе формира нова откако тројца политичари од албанскиот опозициски кампус – неговиот доскорешен партиски лидер Биљал Касами, Изет Меџити од „огнените“ и Африм Гаши од Алтернатива соопштија дека создаваат заеднички опозициски фронт.

Аријанит Хоџа ги собра потребните потписи за да формира партија

Како причина за ваквиот чекор Хоџа наведе дека целта на иницијаторите не е политичка промена, туку „перење“ политички фигури кои до неодамна биле актери во одржувањето на актуелната власт во живот.

Додека Меџити, Касами и Гаши ги поставуваа темелите на опозицискиот блок заменик-претседателот на Беса најави целосно дистанцирање од него 

Утре, на годишнината од Рамковниот договор, Изет Меџити од „огнените“ заедно со дел од незадоволните кои ја напуштија ДУИ, ќе ја формира партијата Демократско движење.

Кога Меџити на 4 август соопшти дека ги собрал потребните потписи за регистрирање партија на Фејсбук напиша–„Нека ова биде добар почеток на нашето политичко патување“.

Изет Меџити ги собра потписите за регистрација на партија