Министерството за здравство информира дека е разрешен в.д. директорот на Центарот за јавно здравје Скопје, д-р Арбен Зибери.
„Зибери е разрешен поради пласирање неточни изјави во јавноста, со што директно наштети на угледот на членовите на Комисијата за заразни болести доведувајќи го во прашање кредибилитетот на здравствените институции во борбата со коронавирусот“,
се вели во соопштението на Министерството за здравство.
Министерството информира дека за нов в.д. директор на Центарот е назначен д-р Александар Стојанов.
Разрешување на Зибери вчера најави министерот Венко Филипче откако тој се пофали дека издејствувал Комисијата за заразни болести да предложи отворање на границите со цел да се вратат иселениците и да гласаат на изборите за премиер Албанец.
Зибери во изјава за „360 степени“ рече дека министерот ја злоупотребува владината говорница за изборни препукувања и порача дека тој како кандидат за пратеник има право на социјалните мрежи да објавува политички ставови.
Во негова одбрана застанаа и од ДУИ од каде што му порачаа на Филипче „да не го негира правото на политичко изразување заради партиски калкулации“.
Министерот Филипче, пак, возврати дека тоа што Зибери е кандидат за пратеник не му дава право да изнесува невистини и да ја поткопува работата на Комисијата.