На почетокот на средбата, домаќинот, саудискиот престолонаследник Мохамед бин Салман, кажа дека Израел има огромна одговорност за злосторствата кои се вршат врз палестинскиот народ и повика на прекин на опсадата на Појасот Газа и прекинување на воените операции со ослободување на заложниците. Инаку, самитот на Арапската лига посветен на конфликтот помеѓу Израел и Хамас се одржува во главниот град на Саудиска Арабија, Ријад.
На средбата присуствува и палестинскиот претседател Махмуд Абас, кој рече дека Палестинците се соочуваат со „неспоредлива геноцидна војна“ и ги повика САД да извршат притисок врз Израел да ја прекине својата офанзива во Појасот Газа. Абас исто така рече дека на Палестинците им е потребна меѓународна заштита од израелските напади.
И египетскиот претседател Абдел Фатах ал Сиси повика на итен прекин на огнот во Газа „без услови и ограничувања“.
Претходно денеска, израелската армија соопшти дека го ликвидирала командантот на Хамас, Ахмед Сијам, кој, како што се наведува, „држел како жив штит околу 1 000 жители на Газа во болницата Рантиси“.
Во соопштението се наведува дека по разузнавачките информации собрани од Шин Бет и Управата за воено разузнавање, израелските војници упатиле борбен авион да ја нападне локацијата каде што се наоѓал Сијам, командантот на единицата Насер-Радван на Хамас, пренесува „Тајмс оф Израел“.
Војската соопшти дека Сијам бил убиен додека се криел во училиштето Ал Бурак во градот Газа, заедно со други оперативци на Хамас под негова команда. Дополнително, израелскиот претседател Бенјамин Нетанјаху го отфрли барањето на францускиот претседател Емануел Макрон за прекин на бомбардирањето на Појасот Газа бидејќи, како што кажа, Хамас бил виновникот што оваа војна воопшто започнала, кога одлучиле на 7 октомври да го нападнат Израел и да извршат масакр на невини цивили.