Се извинуваме што нема да можеме да вршиме услуги и законски обврски кон граѓаните, но ваквата мерка главно е преземена поради безбедноста на вработените во општинската администрација, но и на граѓаните кои се обраќаат до Општината, соопштија од Општина Арачиново
Општинската администрација во Арачиново денеска нема да работи поради „безбедносни причини“, соопштија од Општината на Фејсбук.
„Се извинуваме што нема да можеме да вршиме услуги и законски обврски кон граѓаните, но ваквата мерка главно е преземена поради безбедноста на вработените во општинската администрација, но и на граѓаните кои се обраќаат до Општината“,
се наведува во објавата на официјалната фејсбук-страница на Општина Арачиново.
Во објавата се додава дека ваквата одлука е донесена откако по вторпат била нарушена безбедноста на вработените во општинската администрација и на градоначалникот Ридван Ибрахими.
„Таквата одлука е против нашата волја и желба, но е неизбежна“,
се додава во објавата во која се посочува дека за следното решение за работењето на локалната самоуправа граѓаните ќе бидат навремено информирани.
Министерството за внатрешни работи вчера информира дека полициски службеници во вторникот го привеле 69-годишниот арачиновец Р. А., откако градоначалникот Ибрахими во СВР Скопје пријавил дека додека тој не бил присутен во општинската зграда, приведениот пред други присутни лица упатувал закани по неговиот живот.
Според Ибрахими, заканите биле изречени „во врска со предмет за доделување на користење на земјиште“.
Од МВР информираа дека по документирањето на случајот, против приведениот ќе биде поднесена пријава за сторено кривично дело „загрозување на сигурноста” по член 144 став 4 од Кривичниот законик.
Ибрахими лани во септември во полицијата пријавил дека бил цел на физички напад.
Според тогашното соопштение на МВР, на 13 септември 2022 година во 09:46 часот градоначалникот на Арачиново пријавил дека бил физички нападнат од неколку лица.
Како што објавија тогаш дел од медиумите на албански јазик во земјава, Ибрахими тврдеше дека напаѓачите ги предводел член на семејството на поранешниот градоначалник на Арачиново, Брахим Ајвази.