Бизнисменот во петок, 16 јули, треба да седне на обвинителна клупа во Основниот кривичен суд, каде треба да стартува судењето за „Плацови на Водно“. Со него обвинети се и поранешниот премиер, Никола Груевски и ексдиректорот на УБК, Сашо Мијалков, како и Ристо Новачевски, Ненад Јосифовиќ и мајката на Камчев, Ратка Куновска-Камчева
Иако понудил 4,4 милиони евра во недвижности и 400 илјади евра во кеш, Орце Камчев обвинет во случајот „Плацовите на Водно“ ќе остане во притвор во Шутка. Пред два дена Апелацискиот суд во Скопје повторно ја одбил жалбата на Камчев иако Вишото обвинителство прифатило замена на затворски со домашен притвор за обвинетиот бизнисмен, јавува Телма ТВ.
Меѓу имотот кој го нудел е и куќата во Бардовци каде беа направени снимките со парите и чантата „Луј Витон“ од случајот „Рекет“.
Судиите сметале дека висината на гаранцијата од речиси 5 милиони евра не гарантира дека тој нема да избега, како и дека здравствената состојба, откако тој лежеле на Кардиологија, „не може да доведе до отстранување на стравот од бегство на обвинетиот“.
Камчев во петок, 16 јули, треба да седне на обвинителна клупа во Основниот кривичен суд, каде треба да стартува судењето за „Плацови на Водно“. Со него обвинети се и поранешниот премиер, Никола Груевски и ексдиректорот на УБК, Сашо Мијалков, како и Ристо Новачевски, Ненад Јосифовиќ и мајката на Камчев, Ратка Куновска-Камчева.
Според обвинението, во периодот од јуни 2006 до октомври 2012 година, Груевски како лидер на партија наместо да прикаже пари како примени донации во ВМРО-ДПМНЕ, за себе прибавил 1,3 милион евра (79 972 140 денари), а потоа ги пуштал во оптек и купувал парцели на Водно. Станува збор за земјиште на кое имало шума, а кое со промените во Генералниот урбанистички план (ГУП) било пренаменето во градежно. Покрај имотот на Водно, обвинението опфаќа и два стана во главниот град и две парцели во Крушево за кои обвинителството тврди дека се прекривал вистинскиот сопственик.
Груевски е обвинет за делата перење пари и противправно стекнување и прикривање на имот. Камчев, неговата мајка, како и Новачевски и Јосифовиќ се товарат за перење пари, додека Мијалков е обвинет за помагање во делото перење пари.
Камчев речиси 4 месеци се наоѓа во притвор токму за овој предмет, а Мијалков е во Шутка за случајот „Трезор“ каде е неправосилно осуден на 8 години затвор. Со поднесувањето на обвинението, Јосифовиќ и Куновска-Камчева добија обврска да се јавуваат еднаш неделно во судот, а на мајката на Камчев ѝ беа одземени и македонскиот и бугарскиот пасош.
Судот тогаш одреди притвор и за Груевски, но со оглед дека тој е во бегство во Унгарија мерката за него би стапила на сила ако некогаш биде достапен за македонските органи.