Поддршката на Анкара, за која денеска информирал неименуван висок турски функционер, доаѓа три дена по посетата на Руте на Турција каде што имаше средба со претседателот на земјата Реџеп Таип Ердоган
Турција им порачала на своите сојузници во НАТО дека Анкара ќе ја поддржи кандидатурата на холандскиот премиер во заминување Марк Руте за функцијата генерален секретар на Алијансата, објави денеска новинската агенција Асошиејтед прес (АП) повикувајќи се на изјава на високорангиран турски функционер.
Според агенцијата, високиот турски функционер изјавил оти за ова Турција денеска ги известила дипломатите на другите земји членки на НАТО во Брисел, пренесува регионалниот сервис на Радио Слободна Европа (РСЕ).
Одлуката, пишува сервисот, доаѓа три дена по посетата на Руте на Турција каде што имаше тет-а-тет средба со претседателот на земјата Реџеп Таип Ердоган.
Актуелниот генсек на НАТО, Јенс Столтенберг, кој е инаку поранешен премиер на Норвешка, се приближува до крајот на својот мандат на чело на сојузот, кој му беше продолжуван неколку пати бидејќи Северноатлантската алијанса сакаше да одржи континуитет и стабилност по руската инвазија на Украина во февруари 2022 година.
Членките на НАТО, Турција и Унгарија, претходно изразија резервираност за кандидатурата на Руте. Унгарската влада на премиерот Виктор Орбан, според дипломатски извори, ќе биде најтешко да се убеди бидејќи веќе отворено се спротивстави на кандидатурата на холандскиот премиер во заминување.
Официјални претставници и дипломати на 32-те земји членки на Алијансата бараат номинацијата за наследник на Столтенберг да биде завршена до крајот на овој месец пред да започнат изборите за европскиот парламент закани за периодот од 6 до 9 јуни.
Соединетите Американски Држави (САД), кои го имаат најважниот глас при именувањето, веќе соопштија дека го поддржуваат Руте за функцијата. Вашингтон се надева дека назначувањето ќе биде финализирано пред самитот на Алијансата во Вашингтон, што треба да се одржи во јули.
Инаку, НАТО годинава одбележува 75 години од формирањето.