„Ако погледнеме наназад, ќе се види дека и минатата година кога бевме далеку од избори, во декември беше донесен Законот за финансиска поддршка на ранливата категорија граѓани“, вели Тренчевска
Антикризните мерки што ги усвои Владата не се за предизборни цели, туку за поддршка на граѓаните во услови кога сè уште треба намалување на последиците од енергетската и ценовната криза, вели министерката за труд и социјална политика Јованка Тренчевска.
„Пакетот мерки е во периодот кога имаме зголемени трошоци за енергенси секој во семејството, кога сѐ уште ги чувствуваме последиците од енергетската и ценовната криза, така што е наменета за поддршка на граѓаните“,
рече Тренчевска денеска одговарајќи на новинарско прашање пред деветтата Меѓународна конференција посветена на жената Ромка и жените патувачи во организација на Советот на Европа и Владата на Република Македонија.
Ако погледнеме наназад, додаде таа, ќе се види дека и минатата година кога бевме далеку од избори, во декември беше донесен Законот за финансиска поддршка на ранливата категорија граѓани. И оваа година, додаде Тренчевска, е донесен нов пакет антикризни мерки и ќе се донесе повторно закон како ќе се имплементираат мерките што се посочени кон ранливите категории граѓани.
Според Тренчевска, со овој пакет антикризни мерки, особено во делот на ранливата категорија граѓани, ќе бидат опфатени приближно 440 илјади граѓани млади, ученици од основно и средно, студенти, лица кои примаат одредени социјални права и пензионери со ниски пензии.
Таа вели дека голем број пензионери се задоволни со финансиската помош што ќе ја даде Владата, но сепак, рече дека од 336 илјади пензионери не очекуваат дека секогаш сите ќе поддржуваат одредена владина политика.
Министерката очекува во наредните денови да се објави информација за начинот на кој ќе се аплицира за најавената финансиска поддршка на учениците и студентите.
„Верувам дека во текот на наредните денови ќе имаме информација за на кој начин и каде учениците во основните и средните училишта, како и студентите, ќе можат да аплицираат за мерката што се однесува за нив. Верувам дека начинот на апликација ќе биде едноставен за да можеме во декември да почнеме со имплементација на финансиската поддршка токму за младите“.
рече Тренчевска.
За мерките кои се под надлежност на Министерството за труд и социјална политика нема да се аплицира и помошта ќе биде исплатена на сметките на опфатените лица согласно евиденциите на институциите.
„За МТСП во делот на мерките што ние ги менаџираме, лицата со попреченост, децата со попреченост, самохрани родители кои примаат гарантирана помош и за пензионерите нема да има апликација, согласно евиденцијата на МТСП и на Фондот за пензиско и инвалидско осигурување, ќе си добијат средства на нивните трансакциски сметки. Секако, ако некој смета дека е исклучен, ќе има право да си поднесе приговор или жалба“,
рече Тренчевска.