„Суштината на овој проект е воведување на дигитална верзија на лични карти и возачки дозволи познати како ID Wallet или Ај-ди паричник. Овие паричници претставуваат револуција во начинот на кој граѓаните се идентификуваат и пристапуваат до услугите. Тие овозможуваат безбеден и лесен начин за македонските граѓани, жители и компании да го докажат својот идентитет при пристапување до дигитални услуги“, вели министерот за дигитална трансформација
Аплицираме на програмата на Европската Унија, „Дигитална Европа“, што ќе ни овозможи да развиеме мобилна апликација за државни услуги. Овој проект наречен „Супер апликација Ели“ со вредност од 1,2 милиони евра, не е само уште еден технолошки чекор напред, туку ќе претставува револуционерна демократизација на пристапот до јавните услуги. Ова денеска на прес-конференција по повод првите 100 дена од работата на Министерството за дигитална трансформација го најави министерот Стефан Андоновски, посочувајќи дека преку апликацијата, секој граѓанин ќе има пристап до административни услуги директно преку својот мобилен телефон независно од тоа каде се наоѓа.
„Суштината на овој проект е воведување на дигитална верзија на лични карти и возачки дозволи познати како ID Wallet или Ај-ди паричник. Овие паричници претставуваат револуција во начинот на кој граѓаните се идентификуваат и пристапуваат до услугите. Тие овозможуваат безбеден и лесен начин за македонските граѓани, жители и компании да го докажат својот идентитет при пристапување до дигитални услуги“,
вели тој.
Преку апликацијата, како што вели министерот, секој граѓанин ќе има пристап до широк спектар на административни услуги директно преку својот мобилен телефон независно каде се наоѓа.
„Се надевам дека на почетокот или во текот на 2025 година ќе имам чест да ја промовирам оваа револуционерна апликација. Ова ќе биде голем чекор напред за дигитализација и модернизација на државните услуги“,
рече Андоновски.
Најави дека се работи на целосен редизајн на порталот uslugi.gov.mk.
„Ќе го направиме лесен за употреба, со нови функционалности, пристапен за лицата со попреченост. Порталот планираме да прерасне во едноставна и единствена точка за контакт помеѓу граѓаните и институциите“,
вели министерот.
Во 2025 година, според него, се планира да се додадат најмалку 100 нови услуги на овој портал, а целта е да се создаде сеопфатен екосистем на дигитални услуги што ќе ги покрие сите аспекти на интеракции меѓу граѓаните и државата.
„Овие нови услуги ќе опфаќаат широк спектар на области, од административни процедури во Министерството за внатрешни работи, до услугите на Фондот за пензиско и инвалидско осигурување и Министерството за правда и други институции“,
рече тој.