Ќе се потрудиме сите дополнителни количини на електрична енергија да бидат обезбедени од домашното производство. Една од опциите за обезбедување поголемо домашно производство е и преку работата на ТЕ-ТО за кое се прават разговори и анализи како во текот на ноември ТЕ-ТО да работи, вели советникот Андонов
Секојдневно се обезбедуваат сто отсто од потребите на регулираниот пазар, односно за домаќинствата и за малите потрошувачи. Досега нема направено увоз на ниту еден киловат-час електрична енергија за задоволување на потребите на овој пазар, рече на денешната прес-конференција Виктор Андонов, советник на премиерот за енергетика.
Според него, се прават максимални напори за да биде зголемено домашното производство на електрична енергија.
„Ќе се потрудиме сите дополнителни количини да бидат обезбедени од домашното производство. Една од опциите за обезбедување поголемо домашно производство е и преку работата на ТЕ-ТО, кое не работи во овој период. Се прават разговори и анализи како во текот на ноември ТЕ-ТО да работи. По проектирањето на бројките, количините и потребните средства ќе бидат усвоени и ќе бидат објавени од претставници на Владата, по што точно ќе се знае која количина на електрична енергија од каде ќе биде обезбедена“,
прецизира Андонов.
Андонов не прецизираше кога ќе биде потпишан договорот за набавка на природен гас за потребите на топланите во Скопје велејќи дека ЕСМ е државна компанија и нејзиното функционирање подразбира почитување на одредени процедури кои мора да бидат запазени во интерес на граѓаните и токму тоа е и направено.
„Јавноста беше информирана дека е побарано во наредните неколку дена компаниите да достават потребни документи со кои ќе ја докажат сериозноста на својата понуда како што се сериозност за обезбедените количини, договор за техничка соработка, потребни гаранции и по нивното доставување јавноста навремено ќе биде информирана“,
истакна Андонов.
Андонов потенцираше дека грејната сезона почна навреме и до овој момент се одвива континуирано, без прекини во испораката и без технички проблеми и увери дека и во текот на ноември ќе има топлина за сите граѓани на Скопје, а начинот на кој ќе биде обезбедена ќе биде објавен во следните неколку дена.