Тврдењето дека во Северна Македонија е најголема бројката на заболени е погрешно и манипулативно ако не се земе предвид пристапот на здравствените власти за начинот на тестирање. Погрешно е и да се тврди дека некоја земја е подобра од другата врз база на различни критериуми за споредба, се наведува во анализа на проектот „Борба против лажни вести“ на „Мост“
Последните две седмици Северна Македонија бележи раст на бројот на инфицирани лица од ковид-19. Во државите од соседството, пак, како што сите ние сакаме да правиме споредби, овој тренд на зголемување постои, но не е така изразен како кај нас. И сега, гледано праволиниски или црно-бело некој ќе рече “ама во Северна Македонија е најголема бројката на заболени”. Е, токму тоа е погрешно тврдење и предизвикува манипулација и паника, доколку не се земе предвид пристапот на здравствените власти за начинот на тестирање. Уште повеќе погрешно е да се тврди дека некоја земја е подобра од другата врз база на различни критериуми за споредба, се наведува во анализа на проектот „Борба против лажни вести“ на „Мост“.
Според анализата, за разлика од сите земји во регионот, последните четири недели во Северна Македонија се тестираат и оние граѓани кои не развиле никакви симптоми и немаат акутен респираторен синдром, туку биле во контакт со случај потврден на ковид-19. Токму ова е отстапувањето кое не дозволува споредба на Северна Македонија со ниту една земја од регионот. Сите други, како што се посочува, чекаат 14 дена (период потребен да се развијат симптоми) за да ги тестираат оние кои биле во контакт со лице заболено од ковид-19, додека кај нас тоа се прави веднаш со сите кои биле во контакт со тоа лице.
Понатаму, се наведува дека резултатот од оваа стратегија е зголемувањето на бројот на активни случаи како и појава на огромен број на асимптоматски случаи. Повеќе од 3/4 од вкупниот број инфицирани се без никаков симптом односно ја немаат развиено болеста. Според официјалните изјави и податоци, еден параметар кој оди во прилог на ова тврдење е дека само 15-20 проценти од активните случаи се со посериозни симптоми и се хоспитализирани. Додека другите 80-85 проценти се или со благи симптоми или без никакви симптоми (асимптоматски). Имајќи го предвид овој факт, многу е нормално во државите од регионот да има помал број на активни случаи кога огромен процент од оние кои се инфицирани, а не се заболени (немаат симптоми), не се тестирани.
„Во рамките на националните стратегии и политики за тестирање, најголемиот дел од државите во регионот земаат предвид два параметри кои им се заеднички или во мала мерка отстапуваат. Секоја од овие држави ги тестира само оние граѓани кои имаат акутен респираторен проблем и/или развиле некои од посочените симптоми на болеста како што се покачена телесна температура, кашлање, потешкотии при дишење и др. Ова значи дека, доколку во едно семејство се појави член со симптоми на ковид-19 и при тестот се потврди како позитивен, а другите членови немаат никакви симптоми, тие не се тестираат, туку во следните 14 дена се во изолација и под надзор. Ако развијат некој од симптомите, тогаш се тестираат, а со тоа стануваат дел од државните статистики“,
се посочува во текстот на „Борба против лажни вести“.