Избраната кандидатка во текот на еден ден ќе ја следи работата на шведската амбасадорка, ќе присуствува на состаноци и ќе учествува во целокупните активности на Амбасадата. На крајот на работниот ден, кој ќе започне во 8:30, а ќе заврши во 16:30 часот, „Амбасадорката на ден“ треба да даде кус извештај за завршената работа. Активностите во рамките на позицијата „Амбасадорка на ден“ ќе се вршат на 8 март следната година
Амбасадата на Шведска во Скопје распиша конкурс за позицијата „Амбасадорка на ден“. Позицијата е отворена за девојки над 15-годишна возраст кои, како што наведуваат од Амбасадата, се грижат за родовата еднаквост, еднаквите можности за жените и девојките и ставањето крај на насилството врз нив.
Избраната кандидатка во текот на еден ден ќе ја следи работата на шведската амбасадорка, ќе присуствува на состаноци и ќе учествува во целокупните активности на Амбасадата. На крајот на работниот ден, кој ќе започне во 8:30, а ќе заврши во 16:30 часот, „Амбасадорката на ден“ треба да даде кус извештај за завршената работа.
Заинтересираните кандидати треба да достават кратко мотивациско писмо до 250 зборови во кое ќе објаснат зошто се заинтересирани за оваа позиција, кратка биографија каде што ќе бидат посочени активностите и интересите на кандидатот, како и кои активности ги презел за да го промовира или подобри животот на заедницата во која живее.
„Тоа може да биде акција во која сте иницирале или сте учествувале, која промовира еднаквост помеѓу девојчињата и момчињата, обезбедува помош за стари лица или загрозени лица, грижа за животната средина, итн, две препораки (најмногу 1-2 параграфи) од некој што добро ве познава и може да ве препорача за оваа позиција. Ова може да биде вашиот учител или наставник или секој што ве познава добро и ве видел во акција. Писмена согласност од вашите родители/ законски старатели (за девојчиња на возраст од 15-18 години)“,
стои во повикот на Амбасадата на Шведска.
Пријавувањето на конкурсот ќе се прави преку е-поштата ambassaden.skopje@gov.se, при што треба да се наведе „Апликација за конкурсот #GirlsTakeOver за ‘Амбасадорка на еден ден’“. Конкурсот е отворен до 10 ноември.
Избраната кандидатка ќе биде известена во текот на декември, а активностите во рамките на позицијата „Амбасадорка на ден“ ќе ги извршува на Денот на жената (8 март) следната година.