Од Алтернатива обвинуваат дека истата компанија која ја обезбедува и Клиниката за гинекологија во Скопје учествувала во инцидент во болницата каде што, според партијата, членови на обезбедувањето претепалe човек
Алтернатива бара раскинување на договорот и одземање на лиценцата за работа на компанијата која го обезбедува објектот на Македонската навигација. Случајот со бруталниот напад на контролорите на летови, според партијата, открива дека ваков инцидент што можел да заврши со трагични последици и закана за националната безбедност е овозможен од обезбедувачите на компанијата „2СС секјурити” кои, иако биле должни, не го спречиле овој напад.
„Ситуацијата станува уште појасна сега кога јавноста знае дека сопственикот на оваа компанија e близок со лидерот на ДУИ. Како да сè ова не е доволно, вчера во гинеколошката болница во Клиничкиот центар во Скопје обезбедувањето (зачудувачки, и во оваа болница тендерот за обезбедување го има истата фирма), претепале постар човек без никаква причина“,
велат од Алтернатива.
Според информации на Алтернатива, еден од обезбедувачите не располагал ниту со лиценца за извршување на оваа професија.
„Итно апелираме на компанијата ‘2СС секјурити’ да ѝ се раскине договорот за обезбедување на просториите на М-НАВ. Апелираме до Министерството за внатрешни работи и до релевантните институции да преземат соодветни мерки за утврдување на нашите тврдења и на компанијата да ѝ биде одземена лиценцата за работа“,
се наведува во соопштението.