„Ја имаш способноста да ја кренеш играта со големи поени, во големи ситуации, и апсолутно го заслужуваш ова“, му честита Ѓоковиќ (36) на Алкараз (20) во говорот по завршувањето на мечот
„Ти ме инспирираш многу. Почнав да играм тенис гледајќи те. Ти веќе освојуваше турнири кога јас сум бил роден“, му возврати Алкараз на Ѓоковиќ кога дојде време за неговото обраќање по мечот
Карлос Алкараз е новиот шампион на Вимблдон. Доцна попладнево тој го совлада седумкратниот победник на најпрестижниот тениски турнир на трева во светот – Новак Ѓоковиќ.
Битката траеше пет сета. Првиот, релативно лесно и брзо, го доби Ѓоковиќ со 1:6. Алкараз успеа да се врати во вториот сет со 7:6 и тоа по тај-брејк кој го доби со 8:6. Алкараз потоа играше „со крилја“ и го доби третиот сет со 6:1, но Ѓоковиќ не се предаде и возврати во четвртиот сет со 3:6. Последниот сет му припадна на Алкараз, кој го доби со 6:4.
„Ова е остварување на моите соништа. Реков и претходно дека ќе биде одлично ако победам, но ќе бев горд на себе дури и ако изгубев. Да создаваш историја на овој прекрасен турнир, да играш финале против легенда на спортот. Ова е остварување на сон“,
изјава Алкараз по мечот.
Дел од говорот новиот шампион му го посвети на Ѓоковиќ.
„Морам да му честитам на Новак, беше неверојатно да се игра против него. Ти ме инспирираш многу. Почнав да играм тенис гледајќи те. Ти веќе освојуваше турнири кога јас сум бил роден. Рече дека 36 се новите 26 и го остваруваш тоа. Тоа е неверојатно“,
изјави Алкараз.
Ѓоковиќ со евентуална победа ќе го освоеше осмиот пехар на Вимблдон и со тоа ќе се израмнеше на првото место со Рожер Федерер според бројот на освоени титули на турнирот. Сепак, српскиот тенисер не потона во каење по настапот, туку изрази голема почит кон својот противник.
„Добар ден на сите, не баш за мене, но добар е за Карлос. Морам да започнам со пофалба за Карлос и неговиот тим. Каков само квалитет на крајот на мечот кога мораше да сервираш. Ја имаш способноста да ја кренеш играта, со големи поени во големи ситуации, и апсолутно го заслужуваш ова. Неверојатно.
Мислев дека ќе имам проблеми со тебе на други подлоги, но не и на трева. Сега, од оваа година, приказната е очигледно поинаква. Ти честитам, неверојатно е како се приспособи на подлогата“,
изјави меѓу другото Новак Ѓоковиќ.
Новак Ѓоковиќ има 36 години. Тој стана тенисер со најголем број титули на грен-слем турнирите во историјата на овој спорт кога го освои Ролан Гарос пред околу два месеци.
За 20 годишниот Карло Алкараз ова е втора грен-слем титула. Со победата во Вимблдон сериозно се наметнува како следниот голем играч во тенисот.