Законот за плати е обемен, нацрт-верзијата е веќе пратена до работната група, но сѐ уште не можам да кажам дека имаме варијанта која треба да биде отворена за дебата, изјави денеска министерот за информатичко општество и администрација Азир Алиу.
Според него, со овој закон ќе се креираат стандарди и точно ќе се знае колку бодови има секое работно место, за секој профил.
„Законот за плати го работиме одамна. Дава рамка за целиот платен систем и длабоко веруваме дека со него ќе се реши проблемот со кој во моментов се соочуваме. Сега, во различни институции колеги со ист профил имаат различни плати. Во Министерството за финансии колегите земаат 30 отсто повеќе плата од колегите во други министерства. Дисторзијата е очигледна. Со законот ќе креираме стандарди и ќе се знае точно, преку каскаден систем, колку бодови има секое работно место, за секој профил. Се надевам дека ќе имаме платен систем кој ќе даде јасна слика за административците и за функционерите“,
истакна Алиу одговарајќи на новинарски прашања по прес-конференцијата во Владата.
Инаку, власта го најавува новиот закон за плати повеќе од една година. Премиерот Димитар Ковачевски во ноември лани порача дека мора да има закон што ќе стави ред и конзистентност во примањата, особено на раководните лица.