Ако имаме гаранции дека може да се постигне бројката од 80 гласа, тогаш може да почнеме преговори, ако не, ќе размислиме и ние. Не сакаме да го ризикуваме нашиот рејтинг, вели лидерот на АА
Без разлика дали ќе бидеме дел од владината коалиција или ќе останеме опозиција ние ќе ги изгласаме уставните измени. Имаме пакет на мерки кои ги презентиравме пред јавноста, пред другите политички партии, пред меѓународниот фактор и пред невладините организации и тоа ќе биде нашиот услов за борба против корупцијата и функционирање на правна држава за да ги изгласаме уставните промени, истакна лидерот на Алијанса за Албанците во вечерашното гостување во Дневникот на ТВ Сител.
На прашањето дали добиле поддршка за ова од меѓународниот фактор Тарвари рече дека тие презентираат поддршка за борба против корупцијата и криминалот и дека нема дилема оти сите меѓународни организации и граѓаните даваат поддршка.
Според Таравари да влезеш во Влада со скандали е тешко и тоа може да се одрази на рејтингот, но некогаш граѓаните и општеството се побитни од партијата.
„Ако имаме гаранции дека може да се постигне бројката од 80 гласа, тогаш може да почнеме преговори, ако не, ќе размислиме и ние. Не сакаме да го ризикуваме нашиот рејтинг. Но, ги гледате пораките на сите релевантни чинители – сите велат добро е земјава заедно со Албанија да ги продолжи преговорите. Многу е неодговорно да речете ‘одиме на избори’. Пораките од меѓународниот фактор се ‘почнете ги преговорите’“,
додаде Таравари.
Тој рече дека АА е подготвена да оди на предвремени избори во јуни или септември годинава, но само доколку добие гаранција од политичките субјекти, вклучувајќи ја и ВМРО-ДПМНЕ, дека ќе почне процесот за уставни измени и во тој случај нема да влезе во Владата. Доколку, пак, добие гаранции дека може да се постигне бројката од 80 гласа, тогаш ќе почне преговори за влез во Владата.
Алијанса за Албанците е се уште опозициска партија и се уште е се во игра. Во партијата има ставови про и контра.
Таравари потенцира дека е најголемиот критизер на Владата.
„Но, соочени сме со три кризи – инвазијата во Украина, енергетската и економската криза, како и двете државни кризи: корупцијата и организираниот криминал во институциите, како и уставните измени кои се неопходни за да ги почнеме преговорите. Знаеме кај сме и во каква ситуација сме. Некогаш мора да знаеш каде сакаш да одиш“,
подвлече лидерот на АА.
Таравари потврди дека при евентуален влез на неговата партија во Владата, нема да замине од функцијата градоначалник на Гостивар што моментно ја извршува.
„Добив поддршка од граѓаните да го терам мандатот до крај. Мислам дека е несериозно да се повлечам и да бидам министер, а во АА има многу доктори кои се квалитетни“,
рече лидерот на Алијанса за Албанците, додадавјќи дека се уште не е ништо конкретно договорено со владината коалиција во однос на некаква поделба на ресорските места или министерства.
Таравари напомена и дека не очекува проблематизирање на функционирањето на општините од страна на ВМРО-ДПМНЕ доколку АА стане дел од владината коалиција.
Претходно денеска од Гостивар Таравари најави дека во петок ќе биде донесена одлуката за евентуален влез во Владата.
„За петок е закажан состанок со централното претседателство на партијата. Таму ќе ги носиме финалните одлуки, бидејки знаете дека Централното собрание му одреди на Централното претседателство да ја донесе конечната одлука и евентуално ако има потреба да формира и преговарачки тим. За тоа ќе ве информираме навреме“,
подвлече Таравари на настан по повод одбележување на Денот на турскиот учител во Гостивар.