„Сепак, станува збор за егзистенција на нашите семејства. Немаме плата во оваа криза кога енормно се покачуваат цените. Не можеме дома да ги исплатиме нашите обврски, да однесеме леб, кредити и ред други работи. Впрочем, не можеме да дојдеме на работа, немаме пари за издржување“, истакна претседателот на едната од двете синдикални организации на Пошта, Боро Велигденов
Вработените во „Пошта на Северна Македонија“ денеска повторно одржаа предупредувачки протест за време на паузата барајќи исплата на септемвриската плата.
Претседателот на едната од двете синдикални организации на „Пошта“, Боро Велигденов, на денешната прес-конференција појасни дека протестот го одржуваат поради доцнењето на платите, кои требало да бидат исплатени најдоцна до 15 овој месец.
Ако платите не се исплатат до вторник, предупреди тој, сите вработени од „Пошта“ ќе одржат протест пред Владата.
„Сепак, станува збор за егзистенција на нашите семејства. Немаме плата во оваа криза кога енормно се покачуваат цените. Не можеме дома да ги исплатиме нашите обврски, да однесеме леб, кредити и ред други работи. Впрочем, не можеме да дојдеме на работа, немаме пари за издржување“,
истакна Велигденов.
Велигденов информира дека вчера бил одржан и состанок со Управниот одбор од каде што им посочиле дека во тек е изготвување на план и стратегија за надминување на состојбите, но како што кажа, сè уште немаат добиено официјален одговор во таа насока.
„Ние како синдикат впрочем тоа и го бараме. Не само гаранција секој месец да добиваме редовно плата, туку и да ни ја приложат стратегијата како ќе излеземе ние од ситуацијата, како секој нареден месец ние ќе имаме работа пред сè и ќе се обезбеди плата за сите вработени, бидејќи станува збор за 2 200 вработени, тоа се 2 200 семејства“,
додаде Велигденов.
Претседателот на Сојузот на синдикати на Македонија (ССМ), Дарко Димовски, кој исто така беше присутен на прес-конференцијата, информира дека до Владата ќе поднесат барање да им се нареди на премиерот и на сите министри да ги користат услугите на „Пошта на Северна Македонија“.
Тој рече дека не може да се ангажираат приватни пошти или брзи пошти, а националната пошта која ја има државата како нејзин сервис да не се користи и да не прави приходи од писмата кои, како што рече, се носат во одредени министерства, судски пресуди и слично.
„Значи, решението е државата да си ги користи своите ресурси кои ги има – АД „Пошта на Македонија“ кои се во сопственост на државата. Тоа е решението. Ние ќе бараме тоа да се процесира бидејќи гледаме секакви заклучоци се носат на Влада, па редно е да се помогне и на ова АД во државна сопственост за да може и понатаму да работи, бидејќи знаеме – ја опслужуваме целата држава Македонија, а остваруваме повеќе расходи отколку што добиваме приходи“,
потенцираше Димовски.
Вработените во националната пошта од вчера започнаа со предупредувачки прекин на работата поради неисплатата на септемвриската плата. Предупредувачките прекини на работа, како што најавија вработените, ќе се одвиваат за време на паузата во времетраење од половина час, со цел корисниците на нивните услуги да не бидат оштетени.