„Ако Ахмети мисли дека нови и антидржавни етнички барања преточени во документи и платформи ќе го спасат од одење во опозиција и ќе ги сокрие криминалите на неговата партија, треба да знае само дека тоа забрзано ќе му ја заврши кариерата“, се вели, меѓу другото, во реакцијата на ВМРО-ДПМНЕ на денешната прес-конференција на лидерот на ДУИ
Нема ниту мајоризација, ниту шовинизам, ниту е важно што Ахмети имал чувство на навреденост, важно е што волјата на мнозинството е ДУИ да оди во опозиција и да се соочи со одговорност, е одговорот што стигна од ВМРО-ДПМНЕ по денешната прес-конференција на лидерот на ДУИ од партиското седиште во Мала Речица.
Од партијата која е повеќе од извесно дека ќе ја предводи идната влада, за чие формирање преговорите се во самиот финиш, велат дека почитувањето на Охридскиот договор, на што денеска се осврна Ахмети во своето обраќање, нема врска со фактот дали ДУИ е власт или опозиција.
„Ако одењето на ДУИ во опозиција е кршење на Рамковниот договор, тогаш и Али Ахмети го прекрши кога реши да ја изостави ВМРО-ДПМНЕ од владата и не го почитуваше резултатот на изборите во 2016 година каде што победи ВМРО-ДПМНЕ. Што само значи дека почитувањето на Охридскиот договор нема врска со фактот дали ДУИ е власт или опозиција“,
се вели во реакцијата на ВМРО-ДПМНЕ.
Ахмети, порачуваат оттаму, треба да престане да се однесува како палаво дете кое плаче по играчката која не е негова, затоа што, како што додаваат од партијата ВМРО-ДПМНЕ не е СДСМ ниту, пак, одењето на ДУИ во опозиција има некаква врска со односот на ВМРО-ДПМНЕ кон Албанците.
„Затоа што ДУИ не се само Албанците во Македонија, ДУИ е сегментот кој ги крадеше Албанците исто како и Македонците. Ако Ахмети мисли дека нови и антидржавни етнички барања преточени во документи и платформи ќе го спаси од одење во опозиција и ќе ги сокрие криминалите на неговата партија, треба да знае само дека тоа забрзано ќе му ја заврши кариерата. Првото ветување исполнето, ДУИ оди во опозиција“,
се вели во соопштението на ВМРО-ДПМНЕ.
Претседателот на Демократската унија за интеграција (ДУИ), кој беше опкружен со лидерите на останатите партии од коалицијата „Европски фронт“, денеска на прес-конференцијата во партиското седиште во Мала Речица порача дека заедно започнуваат битка за почитување на духот на Охридскиот договор.
Во таа насока, тој се осврна на резултатите од претседателските и парламентарните избори и посочи дека победник на нив е „Европскиот фронт“ предводен од ДУИ, но оти изборните резултати биле нарушени и продолжуваат да се прекршуваат преку изборен инженеринг пред очите на целата јавност – домашна, регионална и меѓународна.
„И покрај сите аргументи и резултати, дури и со пратеници, дури и со апсолутни бројки на гласови, дури и со победи во две третини од општините, поразените на изборите, без легитимитет на суверениот, потклекнаа целосно игнорирајќи ја волјата на народот, Охридскиот договор, легитимитетот и без никаква почит кон оние кои ги донесоа сите овие квалитативни промени во нашата држава. Во овој контекст, граѓаните не прашуваат, кое е значењето на демократијата кај нас ако мнозинската заедница определува кој ги претставува Албанците, Турците, Ромите, Бошњаците и другите заедници? Зошто овие заедници треба да се организираат во политички партии и да учествуваат на избори за да го добијат легитимитетот на нивните сонародници ако, без разлика на волјата на нашите заедници, најголемата македонска партија одлучува за нив според нивните преференции и претпочитања“,
кажа лидерот на ДУИ.
Зборуваше и за декларацијата која, како што тврди, во декември лани и во јануари годинава ја потпишале „Европскиот фронт“ и опозициските партии на Албанците, а со која се обврзале да не влегуваат во владино партнерство без поддршка на уставните измени од другата страна и гаранција за продолжувањето на европскиот пат на државата.
Говорејќи за демократското право на глас и како тоа им служи на меѓуетничките односи, лидерот на ДУИ, Али Ахмети, на денешната прес-конференција се осврна и победничката партија на неодамнешните парламентарни и претседателски избори, ВМРО-ДПМНЕ.
Според Ахмети, ВМРО-ДПМНЕ во изминатите осум години целата своја кампања ја темелела против Албанците и ДУИ во форма на софистицирана војна употребувајќи нацистички наратив.
„Не заборавајте дека цела кампања на ВМРО за осум години е спроведена против Албанците преку софистицирана војна против ДУИ и ова не се заборава, тоа не може да се заобиколи бидејќи станува збор за нацистички ставови. Земете ги и другите дадени изјави – против САД, против ЕУ, против НАТО, против договорите за добрососедство. Тогаш, ако е така, ќе видиме како ќе се одвиваат работите понатаму. Ние сме во одбрана на легитимитетот и воопшто не се повлекуваме“,
рече Ахмети.