Kандидатот за прв премиер Албанец Насер Зибери нема ниту еден скандал зад себе и него ќе го избереме тука во Собранието, рече денеска претседателот на ДУИ, Али Ахмети.
На прес-конференцијата пред Собранието, Ахмети оцени дека Зибери има многу поголемо искуство отколку останатите двајца кандидати Зоран Заев и Христијан Мицкоски.
„Време е оваа нова генерација зад мене да ја покаже својата вредност, а Вие, сите, определени и неопределени, жени и мажи, млади и стари, излезете и гласајте, заокружете го бројот 9, потврдете ја Вашата вредност давајќи и можност на новата генерација и тие да ја докажат нивната вредност и да го изберат првиот премиер Албанец во Северна Македонија кој ќе се избере токму во ова зграда позади мене, во Собранието“,
рече Ахмети.
Посочи дека нивната идеја за прв премиер Албанец датира уште од нивниот втор партиски Конгрес, одржан на 17 декември 2009 година во Скопје.
Во своето обраќање, Ахмети истакна и дека е дојдено време да се постави, како што рече, последниот камен во ѕидовите на тврдината за да се острани етничката хомогенизација и да им стави крај на предрасудите.