Али Ахмети му порачува на Зоран Заев да не претерува со изјавите дека ќе ја однесе ДУИ во опозиција, бидејќи на таков начин креира ситуации со кои подоцна не ќе може да се справи.
„Има само една сила што може да ја испрати ДУИ во опозиција. Тоа се нејзините гласачи, Албанците во Република Северна Македонија. Ако почнам и јас да зборувам и да раскажувам приказни како Заев, тогаш ќе речам дека ДУИ ќе остане во Владата, но тој нема да биде премиер. Не се закачајте со нас, нема да ви успее“,
рече Ахмети.
Заев, пак, во интервју за „Независен“ вели дека со враќањето на ДУИ кон национализмот таа „сама си ги затвора вратите“, иако досега во Владата имале коректна, но комплицирана соработка.
„Со ДУИ, генерално, имавме коректна соработка во Владата, иако не секогаш беше лесно да се најде заеднички јазик. За многу важни теми за иднината на државата не се согласувавме, но успевавме да најдеме компромис во името на државните и граѓанските интереси. Но времето на уцени на ДУИ заврши. Кој ќе биде премиер и која партија ќе ги предводи институциите не решава ДУИ, туку решаваат граѓаните на фер, слободни и демократски избори“
рече Заев.