Откако пропадна договорот за формирање предизборна коалиција на трите албански парти, Алијанса за Албанците, Беса и Алтернатива против ДУИ, вчера претседателот на ДУИ, Али Ахмети, им порача на Касами и Гаши или да одат заедно или да се вратат кај нивната партија мајка – ДУИ.
„Јас веќе 18 години не сум во нечесни процеси, мене ме гласаа Албанците. Слушнав шпекулации дека се скарале за тоа кој е повеќе ДУИ, Алтернатива или Беса. Повеќето од нив биле во ДУИ. Претседателот на Беса беше државен секретар од редовите на ДУИ, а ист е случајот и со Алтернатива. Ме збуни зошто се караат околу тоа кој бил повеќе ДУИ. И двете страни беа. Затоа, дојдете кај мајката, мајката простува дури и кога детето греши. Или одете заеднички против мајката и победете ја“,
рече Ахмети во емисија на ТВ „Клан Македонија“.
Како што вчера потврдија за „360 степени“ учесници во преговорите, трите опозициска партии на Албанците на претстојните избори нема да одат како заеднички фронт против ДУИ.
„Проценката е дека во случај трите партии да одиме заедно, тоа нема да биде победничка варијанта. Според сондажите, поради расколот меѓу Беса и Алтернатива, членството на едната или другата партија нема да гласа за ваква коалиција. Прашањето за тројна коалиција е затворено. Сигурно е дека ќе има коалиција од две партии. Сега Алијансата е таа што ќе треба да реши со кого ќе настапи на изборите, со оглед дека и кај членовите на Беса и кај членовите и симпатизерите на Алтернатива постои расположение да бидат дел од таква коалиција“,
изјавија вчера за „360 степени“ извори од преговорите.