Агелер и Рокас не сакаат да ги коментираат актуелните истраги на МВР и Обвинителството

Одговарајќи на новинарски прашања, евроамбасадорот Михалис Рокас рече дека во оваа фаза од истрагата за случајот „Лотарија“, Делегацијата на ЕУ нема никаков коментар. Амбасадорката Агелер, пак, не сакаше да го коментира предметот на Обвинителството што го отвори по ставањето на Артан Груби и Енвер Беџети на американската „црна листа“

Амбасадорите на Европската Унија и САД во земјава, Михалис Рокас и Анџела Агелер, засега се без коментар во врска со актуелните истраги на МВР и Обвинителството, конкретно, за случајот „Лотарија“ и за предметот што Обвинителството го оформи по ставањето на поранешниот прв вицепремиер Артан Груби и судијата Енвер Беџети на „црната листа“ на САД.

Одговарајќи на новинарски прашања по настан во скопски Карпош, евроамбасадорот Михалис Рокас рече дека во оваа фаза од истрагата за случајот „Лотарија“, Делегацијата на ЕУ нема никаков коментар.

„Да му дозволиме на самото судство и Јавното обвинителство во земјата да продолжат со истрагата. Мислам дека треба да оставиме правдата да зборува сама за себе“,

изјави Рокас одговарајќи на новинарски прашања по настанот за засадување на дрвца кај новиот Мегапарк во Општина Карпош.

• Скопското обвинителство поведе истрага против шест лица за проневера на над 8 милиони евра во „Државна лотарија“

Претходно денеска ниту амбасадорката на САД, Анџела Агелер, не даде никаков коментар во врска со одлуката на републичкото обвинителство да оформи предмет по ставањето на поранешниот прв вицепремиер Артан Груби и апелацискиот судија Енвер Беџети на т.н. „црна листа“ на САД.

„Не можам. Јас не сум дел од ниту еден од внатрешните истражни процеси во оваа земја“,

рече Агелер прашана за коментар за истрагата по ставањето на двајцата функционери на „црната листа“ на Стејт департментот

• Обвинителството оформи предмет по ставањето на Груби и судијата Беџети на „црната листа“ на САД

Поранешниот прв вицепремиер, ексминистер и висок функционер на ДУИ, Артан Груби, во моментов е под истрага на ОЈО Скопје во случајот „Лотарија“, во кој е осомничен дека заедно со ексдиректорот на акционерското друштво „Државна лотарија“, Перпарим Бајрами, сторил проневера во службата.

Груби е дел и од предметот што републичкото јавно обвинителство го отвори откако тој заедно со апелацискиот судија Енвер Беџети се најде на американската „црна листа“ поради вмешаност во значителна корупција.