Според него, до надлежниот јавен обвинител е доставена ургенција за постапување со оглед дека лицето има дадено исказ во прелиминарна фаза на предистрага кога му бил определен краткотраен притвор
За да биде повикано во фаза на истрага да даде целосен исказ со кој ќе појасни што видел, слушнал и со кои лица преземал дејствија, со цел пронаоѓање на неговата ќерка во период од 27 ноември до денот на неговото лишување од слобода, воедно како, со кого и на кој начин ги обезбедувал и предавал видеозаписите на полициските службеници, како и за многу други прашања битни за целосно расчистување на овој настан, вели адвокатот
Владимир Туфегџиќ, адвокат на Александар Ѓорчевски, татко на 14-годишната Вања Ѓорчевска која беше киднапирана и пронајдена убиена на 3 декември годинава, бара да му биде определен куќен притвор.
Притворот му е продолжен на таткото на Вања, Ѓорчевски, на 4 јануари, кој според истрагата им помогнал на другите да го грабнат девојчето и е осомничен за кривичното дело грабнување. Нему првично му беше определен 48-часовен притвор, а потоа доби уште 30 дена во Истражниот затвор во Шуто Оризари.
Адвокатот Туфегџиќ во изјава за „360 степени“ вели дека како бранител до овој момент бил трпелив и имал разбирање.
„Иако истакнавме посебен предлог за замена на мерката притвор во мерка куќен притвор, свесен сум дека постапката околу укинувањето на притворот ќе трае. Иако спрема осомничениот не е оправдана ниту една мерка, сепак со мерката куќен притвор ќе се задржи кохезијата на семејството кое е длабоко погодено со оваа трагедија“,
вели Туфегџиќ.
Според него, до надлежниот јавен обвинител е доставена ургенција за постапување со оглед дека лицето има дадено исказ во прелиминарна фаза на предистрага кога му бил определен краткотраен притвор.
„За да биде повикано во фаза на истрага да даде целосен исказ со кој ќе појасни што видел, слушнал и со кои лица преземал дејствија, со цел пронаоѓање на неговата ќерка во период од 27 ноември до денот на неговото лишување од слобода, воедно како, со кого и на кој начин ги обезбедувал и предавал видеозаписите на полициските службеници, како и за многу други прашања битни за целосно расчистување на овој настан“,
изјави адвокатот.
Основниот кривичен суд во Скопје на барање на Обвинителството на 4 јануари им го продолжи притворот за уште 30 дена на петтемина осомничени за грабнувањето и убиството на Вања Ѓорчевска и на велешанецот Панче Жежовски.
Меѓу осомничените на кои им е продолжен притворот е и таткото на Вања, Александар Ѓорчевски, кој според истрагата им помогнал на останатите да го грабнат девојчето и се сомничи за кривичното дело грабнување.
Преостанати тројца за кои е одредено продолжување на мерката се Велибор Манев, Влатко Кешишов и Боре Видевски, осомничени за по две кривични дела – убиство и грабнување.
Инаку, првоосомничен за убиството на Вања Ѓорчевска и Панче Жежовски е Љупчо Палевски-Палчо, кој по бегството од земјава, се наоѓа во Турција, каде што беше лоциран и уапсен по меѓународната потерница што по него ја распишаа македонските власти преку Интерпол. Тој се наоѓа во затвор во Турција и во тек е постапката за негова екстрадиција.
Кривичниот совет на Судот го прифатил и предлогот за продолжување на притворот за нови 30 дена за Стефан Димковски, осомничен за помагање на сторител во извршување на кривично дело бидејќи го возел првоосомничениот Палевски од Србија до Турција.
Првично, на осомничените им беше одредена мерка притвор на 5 декември минатата година, непосредно по нивното апсење за грозоморните убиства, кои ја потресоа земјава, но и регионот. Тие тогаш во Судот беа спроведени со избричени глави и во комбинезони кои ги добиле во затворот „Скопје“ во Шуто Оризари.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Велес и на Скопје на 3 декември.
Според информациите од истрагата што на прес-конференција ги изнесоа министерот за внатрешни работи Оливер Спасовски и шефот на скопското Основно јавно обвинителство, Гаврил Бубевски, девојчето било грабнато во влезот од зградата во која живеела, а потоа во вреќа за спиење била ставена во гепек на возило и однесена на локација надвор од Скопје, каде што е убиена.
Убиството на велешанецот, пак, се случило пет дена претходно, односно на 22 ноември. Според информациите што беа досега соопштени, тој бил избран од осомничените поради неговиот автомобил, кој потоа бил користен при грабнувањето на Вања.
На 22 декември од Основното јавно обвинителство соопштија дека ги добиле обдукциските наоди од Институтот за судска медицина, за кои рекоа дека нема да бидат објавени во јавност.
Контроверзниот српски политичар Срѓан Ного во саботата објави емисија на неговиот канал на Јутуб во која тврди дека таткото на Вања, Александар Ѓорчевски, не сноси вина за случајот и дека нема никаква поврзаност со убиството на неговата ќерка.
Според него, случајот претставува класична ликвидација, а не обид за барање откуп.
Дополнително, Ного објави и снимки од наводен разговор меѓу Ѓорчевски и полициски службеници, кои, според српскиот политичар, укажуваат на тоа дека таткото самиот го решил случајот, односно на полицијата и предал материјали за автомобилот „ситроен“ со кој е киднапирана неговата ќерка.
Во емисијата објавени се и снимки од 74-годишниот Панче Жежовски, од денот кога бил киднапиран и убиен.