Адвокатот на Бојан Јовановски – Боки 13, Сашко Дукоски, и бранителите на Катица Јанева, Ирена Фрчкоска и Дељо Кадиев, посочуваат дека во исказите на сведоците во случајот „Рекет“ има контрадикторности во однос на тоа што го зборуваат во судот и на тоа што го кажале во обвинителството за време на истрага.
„Ќе утврди судот што е вистина. Судот е тој кој ја утврдува фактичката состојба, но има доста контрадикторности во изјавите на досега сослушаните сведоци“, изјави Дукоски по завршувањето на денешното рочиште на кое сведочеа сопругата на Орце Камчев, Ана, и сметководителката Мирјана Бошковска.
Со нивните денешни прашања, пред сѐ, до сметководителката, тие се обидуваа да извлечат одговор и во какви апоени биле еврата кои таа ги носела. За парите кои ги извадила од сметките на Ана и Ратка Камчеви во декември 2018 таа рече дека не може да се сети од кои банкноти имало најмалку бидејќи не правела спецификација, додека за тие во февруари 2019 рече дека 80 отсто биле банкноти од по 50 евра.
„Тоа е важно во врска со исказите и конзистентноста на исказите и заради утврдување на фактичката состојба. Инаку и 50 евра да се дадат е поткуп, но има неверојатни контрадикторности“, рече Дукоски.
Адвокатите на Јанева, пак, беа повоздржани по денешното рочиште.
„Не би сакале да коментираме изјави на сведоци. Нашиот коментар ќе го дадеме во завршните зборови. Ги слушавте и самите исказите. Ние во овој момент укажуваме на контрадикторности кои ќе ги искоментираме во завршни зборови“, рече Кадиев.
Ана Камчева денеска рече дека Јанева директно никогаш не побарала пари од неа, а Кадиев смета дека обвинителството нема ниту материјални докази за да докаже дека специјалната обвинителка е вмешана во рекетот.