„Партијата никогаш не ги крила своите средби. Значи, и кога се среќава со Али Ахмети, со лидерот на ДУИ и со опозицијата, со сите. Тие се јавни, нема што да криеме. Единствената цел на Алијанса и на претседателот Таравари е европска Македонија“, вели министерот Меџити
Алијанса за Албанците никогаш не ги криела средбите со други политички субјекти, а единствена цел на партијата и на нејзиниот лидер Арбен Таравари е европска Македонија, вели министерот за здравство Фатмир Меџити.
Изјавата на Меџити доаѓа како одговор на новинарско прашање, а во врска со вчерашната посета на Таравари на Приштина и неговата средба со косовскиот премиер Албин Курти.
„Партијата никогаш не ги крила своите средби. Значи, и кога се среќава со Али Ахмети, со лидерот на ДУИ и со опозицијата, со сите. Тие се јавни, нема што да криеме. Единствената цел на Алијанса и на претседателот Таравари е европска Македонија“,
рече Меџити одговарајќи на прашањето на прес-конференцијата на денешниот настан на Клиниката за урологија.
Тој рече дека е во секојдневна комуникација со Таравари и дека не претпочита себеси да се нарекува политичар, туку лекар.
„Претпочитам да не се нарекувам политичар, но сум дел од владиниот кабинет. Јас сум лекар, таков ќе останам. Со мене како министер, секој кој нема да работи, нема да има иднина. Тоа ќе биде така додека јас сум министер. Кога нема да бидам, ќе бидам невролог, лекар. За здравството сум тука да го вложам целиот мој труд“,
изјави Меџити.
Меџити, меѓу другото, порача и дека политиката треба да ги тргне рацете од здравството, но и од образованието.
„Крајно време е политиката да ги тргне своите раце од здравство, но и од образованието. Јас како министер за здравство тоа нема да го дозволам“,
рече Меџити.
Денеска и министерот за информатичко општество и администрација, Азир Алиу рече дека нема информација за тоа што се зборувало на вчерашната средба на лидерот на Алијанса на Албанците Арбен Таравари со косовскиот премиер Албин Курти. Исто така, Алиу вели и дека не може да каже дали АА ќе биде дел од Европскиот фронт или ќе настапува со опозицијата на изборите.
„Не сум во тек, не сме имале состанок на ниво на партијата бидејќи таму се брифираме. Нашите лични заложби и ангажмани ние можеме внатре да ги искажеме, внатре да се соочиме со различни процеси, различни идеи, теми но на крајот на денот јас ќе ги следам и почитувам сите одлуки донесени од политичката партија“,
рече денеска Алиу.
Вчера во Приштина лидерите на трите опозициски партии на Албанците, здружени во коалицијата „Европски сојуз за промени“, Билал Касами (Беса), Африм Гаши (Алтернатива) и Изет Меџити (Демократско движење), имале средба со косовскиот премиер Албин Курти и со претседателот на парламентот на Косово, Глаук Коњуфца. На средбата освен тројцата опозиционери присуствувал и лидерот на Алијанса за Албанците Арбен Таравари, чија партија е дел од парламентарното мнозинство, заедно со СДСМ и ДУИ.
Официјално соопштение за средбата е објавено и на веб-страница на кабинетот на косовскиот премиер. Во него се наведува дека освен за социјалната и економската состојба на Албанците во Македонија, демократијата и напредокот на односите меѓу етничките заедници, било разговарано и за кандидатот за иден претседател на земјава.
Четворицата лидери од С Македонија, според соопштението на кабинетот на косовскиот премиер, предложиле следниот претседател на земјава да биде од редовите на Албанците, кој „ќе го отелотвори соживотот меѓу етничките групи и ќе го гарантира европскиот пат на Северна Македонија“.
На средбата присуствувал и Беќим Ќоку, кој е советник на Курти. Ќоку кој е од Струга во минатото беше член на Демократската партија на Албанците (ДПА) на Мендух Тачи, а потоа и на Алијанса за Албанците. Тој сега е член на партијата на косовскиот премиер – Самоопределување.
Инаку, средбата доаѓа на три месеци пред одржувањето на парламентарните и на претседателските избори во земјава и истиот ден кога почна да функционира техничката влада задолжена за нивно спроведување, а на чие чело е Талат Џафери од ДУИ.
Лидерот на ДУИ, Али Ахмети, во синоќешното интервју за Радио-телевизија Косово (РТК) повика косовскиот премиер Албин Курти јасно да даде до знаење дали неговата партија Самоопределување ќе учествува на парламентарните избори што на 8 мај ќе се одржат во земјава.
Ахмети ова го кажа коментирајќи ја вчерашната средба меѓу косовскиот премиер Курти, лидерите на трите опозициски партии на Албанците здружени во коалицијата „Европски сојуз за промени“ и лидерот на Алијанса за Албанците, Арбен Таравари, чија партија е дел од мнозинството во македонскиот парламент.
Прашан дали вклучувањето на партијата на Курти на изборите во С Македонија ќе влијае на изборниот резултат, Ахмети вели дека евентуалното учество на Самоопределување на парламентарните избори нема да влијае на резултатот бидејќи, како што кажа, „албанскиот електорат е мошне дефиниран во Македонија“.