Оливер Спасовски објасни вечерва како ексминистерката за внатрешни работи е спроведена во затворот во Шутка и по кои процедури постапувала полицијата за да спречи евентуално бегство
Ексминистерката за внатрешни работи Гордана Јанкуловска вчера била спроведена во КПУ „Идризово“ по наредба на судија за извршување санкции, а врз основа на пресудата донесена од Врховниот суд, како што информира вечерва актуелниот министер Оливер Спасовски, во гостување на ТВ 24.
Тој потенцира дека наредбата издадена од судијата за извршување санкции гласела веднаш да се приведе лицето кое треба да издржува казна затвор.
„Од човечки аспект е оставено одредено време, значи не е веднаш после врачувањето на актот, туку околу половина час подоцна, за да се подготви и да се постапи по наредбата. Таква беше наредбата од Судот и така се постапи“,
посочи Спасовски.
Појасни дека практично се активирал упатниот акт што бил издаден претходно, а откако истекле сите рокови за правните лекови.
Со оглед на тоа што домот на Јанкулоска се наоѓа веднаш до МВР, Спасовски информира дека полицијата имала можност за набљудување за ексминистерката случајно да не го напушти живеалиштето, односно територијата на Скопје, бидејќи по друг предмет има таква мерка на обезбедување.
„Имавме наредби врз основа на Закон според кои постапуваат полициските службеници. За другите случаи за кои се водат постапки се издадени конкретни мерки. Таа е конкретна мерка која е издадена за ненапуштање на живеалиштето. Врз основа на законите за кривична постапка и за полиција го правевме набљудувањето“,
изјави Спасовски, посочувајќи дека следењето треба да се прави исклучиво врз основа на закон и врз одлука на суд.
Како што вели, законот треба да важи за сите. За тоа, вели, нема ниски или високи профили, но сите постапки треба да бидат транспарентни и неселективни.
„Имавме многу сознанија и на основа на тие сознанија презедовме оперативни мерки. Разни сознанија кои беа поврзани со целиот тој случај и тие се дел од документацијата. На основа на тоа беа издадени соодветни наредби“,
нагласи министерот за внатрешни работи.
Гордана Јанкулоска, вчера беше спроведена во КПУ „Идризово“, откако беше осудена на четири години затвор во случајот „Тенк“.