Ревизорите утврдиле дека платата и дел од додатоците се во согласност со законската регулатива, но еден дел се исплатени незаконски
Катица Јанева во забелешките укажува дека никој од Владата во тие 4 години, од 2015 до 2019, немал забелешки на ова на што сега укажуваат ревизорите
Износот на исплатените додатоци во Специјалното јавно обвинителство за 2015 година го надминува износот на исплатените средства за основната плата по лице. Од почетокот на 2016 година до септември 2019 година, по основ на надоместоци за почитување на принципот на тајност и за посебна заштита на приватност, се исплатени средства во вкупен износ од 282 милиони 896 илјади денари (околу 4 милиони евра) за кои ревизијата не обезбеди соодветен критериум.
Ова го констатира Државниот завод за ревизија (ДЗР) по извршената ревизија во Специјалното јавно обвинителство за плати и додатоци на плати и други надооместоци. Ревизијата се однесува на периодот од 2015 до 2019 година.
Врз основа на извршените детални тестирања на доставената документација, како и анализата на податоците од деловните книги, во ревизорскиот извештај се нотира дека додатоците на плата за 2015 година, коишто се предвидени за јавниот обвинител и јавните обвинители во ова обвинителство, го надминуваат износот на исплатените средства за основната плата по лице. Предвид се земени и интерните акти донесени од јавниот обвинител, односно правилникот во кој се утврдени додатоците во апсолутни износи.
„Правото на додаток на плата на јавниот обвинител и јавните обвинители во СЈО е уредено со член 14 од Законот за СЈО, согласно кој утврдени се додатоци на плата, и тоа: додаток за посебните услови за работа, додаток за постоење на висок ризик и додаток за доверливост. Со донесувањето на Законот за изменување и дополнување на Законот за платите на јавните обвинители од декември 2015 година, уредено е дека вкупниот износ на висината на додатоците не може да изнесува повеќе од 35 проценти од основната плата на јавниот обвинител, додека за висината и начинот на утврдување на додатоците, потребно е јавниот обвинител да донесе посебен акт“,
се вели во извештајот.
Од Државниот завод за ревизија утврдиле дека остварувањето на правото на плата, точноста на пресметката, евидентирањето и исплатата се во согласност, во сите материјални аспекти, со релевантната законска регулатива и интерните акти, но не и правото на други надоместоци.
„Освен додатоците на плата за 2015 година, остварувањето на правото на додатоците на плата, точноста на пресметката, евидентирањето и исплатата се во согласност, во сите материјални аспекти, со релевантната законска регулатива и интерните акти. Во однос на остварувањето на правото на другите надоместоци, точноста на пресметката, евидентирањето и исплатата утврдивме дека истите не се во согласност, во сите материјални аспекти, со релевантната законска регулатива и интерните акти“,
се вели во извештајот.
За Јанева, извештајот е тенденциозен
Поранешната специјална јавна обвинителка Катица Јанева, која е во домашен притвор и ја чека правосилноста на пресудата за случајот „Рекет“, писмено доставила забелешки до Државниот завод за ревизија.
„Ја оспорувам законитоста во постапувањето на Државниот завод за ревизија и на ревизорскиот тим при изготвувањето на двата нацрт-извештаи кои ми се доставени. Од содржината повеќе од очигледно е дека се постапувало по нарачка на обвинителството изготвувајќи незаконски и тенденциозен извештај“,
пишува Јанева во забелешките.
Таа тврди дека одлуки за надоместоци за јавните обвинители, истражители и други вработени во СЈО ги донела по примањето на незаконски прислушуваните материјали кои ги предаде СДСМ во СЈО.
„Средствата се исплатувани од редовната буџетска сметка на СЈО, значи нема никакви тајни сефови и сокриени исплати. Секогаш се исплатувани од соодветната ставка каде беа планирани и одобрени со донесените буџети, тоа значи дека надлежните институции одговорни за исплата на овие надоместоци секогаш имале увид во финансиското работење на ова обвинителство“,
додава Јанева.
Таа вели дека не ги прифаќа наводите од ревизорските извештаи дека немала законска основа за носење на наведените одлуки, но прашува, доколку е така, дали евентуална одговорност ќе понесат и другите институции.
„Дали треба да се вклучат двата состави на влади и четирите министри за финансии кои го одобрувале буџетот и исплатите на СЈО, без каква било забелешка?“,
прашува Јанева.
Државниот завод за ревизија не ги прифатил забелешките на Јанева.