Оштетените штедачи на Еуростандард банка денеска побараа итно носење на законско решение со кое државата ќе ги преземе побарувањата на физички и правни лица од Еуростандард Банка, и во целост парично ќе ги обештети, а потоа државата да наплати од стечајната маса.
Штедачите организирани преку Здружение доставиле предлог закон на состанокот со премиерот Зоран Заев и вицепремиерот за економски прашања Фатмир Битиќи, каде како што велат, била искажана волја за решавање на овој проблем.
Николоски Дејан, член на Иницијативниот одбор на Здружението рече дека до нив секојдневно пристигнуваат прашања на штедачите што да прават со своите заштеди во банките, но за жал, како што рече, не можат да дадат конкретен одговор.
„Пропаѓањето на Еуростандард банка или црната за нас среда, 12 август, не остави без нашите лични парични средства. Се работи за цели семејства кои се погодени и фирми кои во ова време на пандемија се соочуваат со проблеми со ликвидност и затворање. Верувавме во систем којшто не заштитува, ги доверивме нашите тешко заработени средства во финансиска институција регулирана и контролирана од државата“,
рече Николоски.