Зоран Милески-Кичеец, кој е второобвинет во случајот „Рекет“, денеска ќе ја слушне пресудата за обвинението за кое се товари во највисоко профилираниот случај годинава во македонското правосудство.
Тој вчера се изјасни за виновен за примање награда за противзаконито влијание, по што судот ја раздвои постапката од останатите обвинети.
„Како одбрана, а исто и обвинетиот, се соочивме со една ситуација во која обвинетиот имал шанса како сведок да го избегне обвинението. Но, дали од незнаење, дали поради случувањата, не знам, тој се довел во ситуација да биде обвинето лице“, рече вчера неговиот адвокат Александар Новаковски.
И Новаковски и адвокатката Сања Алексиќ побараа од судот да ги земе предвид олеснителните околности, како што се тоа дека татко му на Кичеец е тешко болен и дека е татко на пет малолетни деца.
Кичеец не сакаше да зборува многу, само рече дека останува на завршните зборови на своите адвокати.
Обвинителката Вилма Русковска побара при изрекување на пресудата да се земат предвид сите олеснителни и отежнителни околности.
„Со оглед дека обвинетиот ја призна вината, целосно се докажа дека го сторил делото за кое беше обвинет. Предлагам судот да му изрече казна ценејќи ги сите олеснителни и отежнителни околности“, рече Русковска.
Случај „Рекет“ – чин први
На стартот на еден од најекспонираните случаи годинава обвинетите ги слушнаа воведните зборови на обвинителката Вилма Русковска во кои таа најави несоборливи докази против Катица Јанева и Бојан Јовановски.
Боки 13 најави дека ќе ги обелодени организаторите и помагачите на овој, за него, монтиран случај. Јанева, обраќајќи му се Судот, рече дека очекува ослободителна пресуда, доколку не се плашат од заканите на Русковска.
Судењето за Јовановски и Јанева продолжува на 6 декември, за кога како сведоци се повикани Јордан Камчев, кој е сведок во случајот и неговата сопруга Ана.
Александар Михајловски, адвокат на Камчев, непосредно пред почетокот на судењето најави дека и неговиот клиент се приклучува кон кривичниот прогон и оти од Боки 13 и Јанева ќе бара да му се вратат 1,5 милион евра.
Русковска, пак, му порача дека во ваков случај Камчев не може да биде оштетен туку сведок.
Повеќе детали за обвинението, судијката која го води рочиштето и делата што им се ставаат на товар на обвинетите можете да прочитате ТУКА.