Од Синдикатот бараат надлежните институции да реагираат и да ги казнат работодавачите кои нема да исплатат минималец од 14 934 денари, плус надоместоци и додатоци на плата
Сојузот на синдикати на Македонија (ССМ) потсетува дека од 1 јули минималната плата изнесува 14 934 денари, без вклучени додатоци и надоместоци на плата кои треба да се пресметаат согласно со колективните договори.
Од Синдикатот бараат надлежните институции да реагираат и да ги казнат работодавачите кои нема да исплатат минимална плата со надоместоци и додатоци на плата.
„За сите оние газди за кои нема да бидат преземени соодветни мерки и ќе бидат скриени од надлежните институции, како за исплатата на минималната плата така и за исплатата на финансиската поддршка од државата, по пријава на работниците, ССМ ќе поднесе кривични пријави по член 166 од Кривичниот законик против секој еден алчен газда, во името на работниците“,
се наведува во денешното соопштение.
Од ССМ изразуваат надеж дека зголемувањето на минималната плата ќе биде основа за скалесто зголемување на сите плати на работниците.