Населението е прилично олабавено, не се почитува дистанца во рестораните и кафулињата, а често не се носи маска, посочува Кризниот штаб на Општина Битола.
По состанокот кој се одржа откако во градот беа регистрирани 11 новозаболени лица, градоначалничката Наташа Петровска побара поажурно дејствување на надлежните институции на терен, во насока на превентивно дејствување.
Од кризниот штаб уште еднаш испратија апел до населението да биде внимателно, да се почитуваат сите мерки и протоколи за заштита, а граѓаните да одржуваат редовна хигиена на рацете, да носат заштитна маска и да ја почитуваат социјалната дистанца.
Директорката на Центарот за јавно здравје Елизабета Крстева истакна дека изминатите регистрирани случаи во Битола доаѓаат од веќе позната средина, односно од познати четири кластери, каде што лицата се поврзани.
Таа посочила дека епидемиолошката слика во градот не е критична и е резултат од зголемениот број тестирања.