Министерот за здравство на новоименуваните директори на трите универзитетски клиники им порача дека приоритет треба да бидат стабилното работење, воведувањето нови методи, скратувањето на листите на чекање и зголемувањето на довербата кај пациентите
Министерот за здравство Сашо Клековски денеска ги прими новоименуваните директори на универзитетските клиники за гастроентерохепатологија, дигестивна хирургија и пластична и реконструктивна хирургија.

За директор на Клиниката за гастроентерохепатологија е именуван вонредниот професор д-р Владимир Андреевски, специјалист интернист и супспецијалист гастроентерохепатолог. Раководител е на Одделот за ендоскопија при Клиниката и генерален секретар на Македонското здружение за гастроентерохепатологија. Автор е на повеќе од 120 рецензирани научни труда, а неговата експертиза е во областа на интервентната ендоскопија и ЕРЦП, информираат од Министерството за здравство.
За директор на Универзитетската клиника за дигестивна хирургија е именуван асс. д-р Панче Караѓозов, специјалист по дигестивна хирургија, со дополнителна стручна едукација по лапароскопска хирургија во Виена и Истанбул. Учествувал на повеќе меѓународни конгреси од областа на колопроктологијата и хепатобилијарната хирургија.
Нов директор на Универзитетската клиника за пластична и реконструктивна хирургија е асс. д-р Благоја Србов, специјалист по пластична и реконструктивна хирургија и асистент на Катедрата по хирургија при Медицинскиот факултет во Скопје. Тој е и еден од основачите на Македонската асоцијација за реконструктивна микрохирургија (MARM).
На средбата, Клековски им честитал на новоименуваните директори и им посакал успешна работа, посочувајќи ги очекувањата од нивното раководење. Како приоритети ги издвоил стабилното и предвидливо функционирање на клиниките, воведувањето нови методи и медицински постапки, намалувањето на листите на чекање и враќањето на довербата кај пациентите.
Министерот претходно оствари средба и со досегашните директорки на клиниките, проф. д-р Мери Трајковска и прим. д-р Јасмина Ѓорѓиевска-Павловска, како и со досегашниот директор на Клиниката за дигестивна хирургија, проф. д-р Огнен Костовски, на кои им се заблагодарил за досегашната соработка и постигнатите резултати.
Од Министерството посочуваат дека Костовски и Ѓорѓиевска-Павловска, заедно со своите тимови, биле на првата линија во справувањето со последиците од трагедијата во Кочани.
Под раководство на Трајковска, пак, на Клиниката за гастроентерохепатологија биле воведени четири нови методи на лекување.
