Хаџи Василева кратко рече дека просториите ѝ се добро познати, но сега има поинакво чувство за амбиентот поради новата позиција. Искажа и благодарност за гестот на Абази, со пофални зборови за цветниот аранжман

Искра Хаџи Василева ја презеде од својот доскорешен шеф Ислам Абази раководната функција во Основното јавно обвинителство за гонење на организираниот криминал и корупцијата.
На свеченото примопредавање во просториите на Обвинителството, Абази ја пречека својата колешка и наследничка подарувајќи ѝ букет цвеќе.
Хаџи Василева кратко рече дека просториите ѝ се добро познати, но сега има поинакво чувство за амбиентот поради новата позиција. Искажа и благодарност за гестот на Абази, со пофални зборови за цветниот аранжман.
Таа и досегашниот шеф на ОЈО ГОКК, останаа на кратка средба, зад затворени врати, по што ќе заминат во Јавното обвинителство на Република Северна Македонија, на средба до државниот јавен обвинител Ненад Савески.

По средбата е предвидено тројцата обвинители да дадат изјава за медиумите.
Искра Хаџи Василева е четвртиот јавен обвинител кој застанал на чело на оваа институција и втора жена која ќе води обвинителски тим чија задача е да му застане на патот на криминалот кој, според својата дефиниција, води до луѓе со моќ и влијание.
Хаџи Василева има 11-годишно обвинителско искуство. Почна во Основното јавно обвинителство Скопје, а од 2024 година е обвинителка во Обвинителството за гонење на организираниот криминал и корупцијата со кое сега ќе раководи. Ова значи дека работната средина веќе ѝ е позната.
За нова шефица беше избрана 28 октомври на непосредни избори. Покрај нејзиното, на гласачкото ливче беа имињата на уште четворица нејзини колеги. На изборите, на кои гласаа обвинители од сите јавни обвинителства во државата, Хаџи Васелва доби 64 гласа, седум повеќе од обвинителот од Вишото јавно обвинителство (ВЈО) Скопје, Трајче Пеливанов. Трет, според бројот на освоени гласови (вкупно 30), беше Јован Цветановски, исто така од ВЈО Скопје, додека колегата на Хаџи Василева од ОЈО ГОКК, Фатон Азизи, доби 14 гласа. Најмалку гласови – вкупно шест – доби обвинителката од ОЈО Скопје, Лидија Раичевиќ.
На 29 октомври тричлената комисија на Советот на јавните обвинители за спроведување на изборите ги потврди резултатите, а на 4 ноември Советот едногласно ја потврди Искра Хаџи Василева за шефица на ОЈО ГОКК.
Одлуката стапи во сила на 14 ноември. Два дена претходно, односно на 12 ноември, таа ја даде свечената заклетва пред Советот на јавните обвинители. По свеченоста, Хаџи Василева пред медиумите изјави дека приоритетите веќе ѝ се дефинирани. Под нејзина палка, како што кажа, фокусот на обвинителството ќе биде ставен на поефикасен и директен кривичен прогон, со акцент на предметите од јавен интерес. Се осврна и на ресурсите во Обвинителството. Рече дека тие во одреден дел се ограничени, но оти ќе бидат искористени за што поуспешни резултати во работата, додека во меѓувреме ќе води борба за нивно зголемување.
Инаку, Хаџи Василева стана препознатлива во јавноста преку неколку звучни предмети од висока корупција. Таа го застапува случајот против апелацискиот судија Ѓоко Ристов, во чиј семеен дом во Неготино беа пронајдени 350 000 евра заѕидани во ѕид. Го потпишува обвинението во случајот против поранешниот директор на Државниот инспекторат за земјоделство, Васе Анакиев, за примање мито, а ја води и истрагата против ексдиректорот на Царинската управа, Стефан Богоев.
Во нејзиното портфолио е и случајот за марихуана против поранешниот градоначалник на Ново Село, Боро Стојчев , а беше обвинителка и на почетокот од случајот против кардиологот Жан Митрев.
По примопредавањето на функцијата, новоизбраната шефица на ОЈО ГОКК, Искра Хаџи Василева, и нејзиниот претходник Ислам Абази ќе одат на средба со државниот јавен обвинител Ненад Савески.
Тој во телевизиско гостување во четвртокот минатата недела изјави дека има целосна доверба во Хаџи Василева, при што оцени дека таа, како што кажа, беспрекорно ќе одговори на предизвиците што ги носи раководењето со Основното јавно обвинителство за гонење на организираниот криминал и корупцијата.
Во однос на досегашниот прв човек на ОЈО ГОКК, Ислам Абази, Савески оцени дека неговиот мандат поминал без институционални дамки, со ниту една дисциплинска постапка или некој скандал во неговото работење.
Инаку, Абази се враќа во Вишото јавно обвинителство Гостивар, од каде што и дојде откако беше избран за шеф на ОЈО ГОКК во 2022 година. Неговата наследничка, Хаџи Василева, доби четиригодишен мандат, а наследи и неколку предмети од кои дел се заглавени, а дел чекаат јавнообвинителски одлуки.
