Продажбата на акциите, според Народната банка, ќе се спроведе преку Македонската берза на хартии од вредност, по моделот „сè или ништо“. Ова значи дека се продава целиот понуден акционерски пакет, без можност за купување само на дел од акциите
Станува збор за 372 742 обични акции, односно 95,336 проценти од вкупниот број акции што се во сопственост на Алта банка АД Белград, која е во стечај
„Доколку акциите не бидат продадени на првата аукција, следните аукции ќе се одржуваат последователно, на 1, 2, 3, 4 и 7 декември 2026 година“, се наведува во соопштението од Народната банка
Народната банка на Македонија утрово соопшти дека ја објавила постапката за продажба на доминатниот акционерски пакет на Алта банка АД Битола, а во насока на изнаоѓање нов сопственик и создавање услови за натамошно стабилно работење на банката.

Како што информираат оттаму, станува збор за 372 742 обични акции, односно 95,336 проценти од вкупниот број акции што се во сопственост на Алта банка АД Белград, која е во стечај.
Продажбата на акциите, според централната банка, ќе се спроведе преку Македонската берза на хартии од вредност, по моделот „сè или ништо“. Ова значи дека се продава целиот понуден акционерски пакет, без можност за купување само на дел од акциите.
Првата јавна берзанска аукција е закажана на 30 ноември, а почетната цена изнесува 3 777 денари по акција, и утврдена врз основа на тековната берзанска цена.
„Доколку акциите не бидат продадени на првата аукција, следните аукции ќе се одржуваат последователно, на 1, 2, 3, 4 и 7 декември 2026 година. На секоја наредна аукција почетната цена ќе биде намалена за 10% во однос на почетната цена на претходната аукција“,
се наведува во соопштението од Народната банка.
Оттаму посочуваат дека заинтересираните инвеститори треба најдоцна до 19 ноември да достават барање до Народната банка за добивање претходна согласност за стекнување квалификувано учество во банката, како и писмена изјава дека ќе ги уплатат средствата потребни за купување на акциите. На аукциите ќе можат да учествуваат лицата што ги исполнуваат законските услови.
Постапката, велат од централната банка, е дел од активностите насочени кон обезбедување нов сопственик на Алта банка АД Битола, создавање услови за нејзино натамошно работење и зачувување на интересите на штедачите и останатите клиенти.
За потсетување, Народната банка на Македонија на 2 ноември воведе привремена администарција, односно го презеде управување со Алта банка АД Битола, откако на нејзиниот доминантен сопственик Алта банка АД Белград му беше одземена дозволата за работа од страна на Народната банка на Србија и беше погласен стечај.
Српските власти отворија истрага против сопственикот на Алта банка Белград, Давор Мацура поради основано сомневање дека изнел огромни средства од трезорот на банката, во рамките на која му беше одреден 30-дневен притвор.
