Филипче му порача на Мицкоски дека не може да се дистанцира од одговорноста за влезот на Алта банка на македонскиот пазар, бидејќи тоа се случило во 2025 година, кога тој бил премиер, а Трајко Славески гувернер на Народната банка
Премиерот Христијан Мицкоски, во својство на сведок на денешната надзорна расправа за Алта банка во Собранието објави одлука на Владата, предводена од тогашниот премиер Димитар Ковачевски, со која се барало воспоставување деловни односи со банката.
Посочи дека од извадокот од нацрт-записникот од владината седница од 24 октомври 2023 година може да се види дека прашањето за влез на Алта банка во тогашната Стопанска банка Битола било отворено во времето кога премиер бил Димитар Ковачевски.
На седницата покажа официјална одлука објавена во „Службен весник“ број 123 од 2023 година, со која тогашната влада, предводена од СДСМ, дала согласност за продажба на акции во Стопанска банка АД Битола, денешна Алта банка.
Според Мицкоски, од стенограмот се гледа дека тогашниот министер за финансии Фатмир Бесими побарал од Државното правобранителство да стапи во деловни односи со Алта банка Србија. Како членови на тогашната влада, тој ги посочи и половина од сегашната пратеничка група на СДСМ.
„Дали тогаш тие не знаеле кој е Давор Мацура? Тогаш на владината седница била присутна половина влада. Сите тие гласале. Одлуката за влез на Давор Мацура ја носи владата на СДСМ со ДУИ. Нема да го читам целиот стенограм, нема да биде пристојно“,
рече Мицкоски, држејќи го записникот в рака.
Мицкоски му порача на Филипче дека неговиот одговор е на неговото прашање како дозволиле на пазарот да влезе Алта банка и нејзиниот сопственик Давор Мацура во Македонија.
„Мојата теза е следна, дека во 2023 владата на СДСМ и ДУИ донела одлука да го задолжи државното правобранителство да стапи во комуникација со истото ова лице Давор Мацура и Алта банка Србија и да влезе во деловни односи со Алта банка. Вашата влада, господине Венко Филипче, и на ДУИ, на предлог на министерот од ДУИ, Фатмир Бесими, му наложува на Државното правобранителство да влезе во деловни односи со лицето Давор Мацура, сопственикот на Алта банка Србија, и да ги оттуѓи акциите во сопственост на Македонија, којашто ги има во банката којашто ја купува Давор Мацура, односно Алта банка. Така што многу пред да дојде Алта банка во Македонија вие како влада воспоставувате деловни односи со тоа лице“,
кажа премиерот.
Во текот на расправата, Мицкоски реагираше и на довикувањата на пратениците во позадина, а потоа праша дали во 2023 година немало руски капитал и криминални пари.
„Тоа е мојата контратеза на вашата контратеза дека ние сме дозволиле, а во суштина вие многу порано сте знаеле и сте ја довеле државата во деловни односи со ова лице и со неговиот капитал“,
рече Мицкоски одговарајќи на прашања на пратениците Венко Филипче и Бојан Стојановски.
Пратеникот и лидер на СДСМ, Венко Филипче, го праша Мицкоски да одговори што му кажал на гувернерот на Народната банка, Трајко Славески, кога му нареди да дозволи влез на Алта банка во Македонија.
„Вие бевте премиер во 2025 година. Алта банка влезе во време кога вие бевте премиер, а Трајко Славески гувернер“,
рече Филипче.
Му порача и дека актуелната Влада е одговорна за одлуката со која Алта банка влегла на македонскиот пазар.
Според него, Мицкоски не може да се дистанцира од одговорноста за случајот со Алта банка, ниту да тврди дека не знаел за кого станува збор, бидејќи уште една година наназад јавно се зборува за банката и нејзиниот сопственик Давор Мацура.
„Ја браните банката како ваша да е. Како тука да влезе Дојче банк или некоја светска банка, а не Алта банка чиј сопственик сега е во затвор поради перење пари во Србија. Имате обврска да знаете каков е кредибилитетот на газдата на банката која влегува на пазарот. Тоа што случува е доказ дека нашето укажување е вистинито. Клучното прашање е зошто дозволивте влез на таква банка кај нас. Зошто не видовте како таа банка е казнета во Австрија. Која е цената што сега сите ние треба да ја платиме за сомнежот во банкарскиот сектор“,
посочи тој.
Пратеникот Бојан Стојаноски од ВМРО-ДПМНЕ посочи дека претходната влада предводена од СДСМ уште во 2023 година дала согласност за продажба на акции во тогашната Стопанска банка АД Битола.
„Сведоци сме на серија политички обвинувања од СДС и пратеникот Венко Филипче, кои настојуваат целокупната одговорност за случувањата со Алта банка, да ја припишат на актуелната Влада. Меѓутоа, постои официјална одлука објавена во Службен весник број 123 од 2023 година, со која тогашната влада предводена од СДС, дала согласност за продажба на акции во Стопанска банка АД Битола, денешна Алта банка. Што точно, открива одлуката за постапувањето на претходната влада, дали била реализирана продажба врз нејзина основа и по што се разликува од одлуките на сегашната влада во 2026 година“,
праша тој.