Во принцип сум оптимист кога студентите, младите и сите заедно, поддржани од граѓаните во еден демократски процес, се изјаснуваат за една промена. Не гледам со скептицизам. Тие се исправени пред предизвици, но очекувам оптимистички елементи со составувањето на новата влада и политиките што ќе ги градат – како за самата држава, така и за регионот, порачува претседателот на Собранието
Прашан за актуелните политички случувања и граѓанските протести во регионот, претседателот на Собранието, Африм Гаши, во интервју за „360 степени“ на МРТ 1, рече дека секоја промена ја доживува како позитивен чекор, особено кога зад неа стојат студенти, млади и поширока поддршка од граѓаните. Во однос на изборите кои се одржаа во Србија и заминувањето од власт на Вучиќ, Гаши вели:
„Во принцип сум оптимист кога студентите, младите и сите заедно, поддржани од граѓаните во еден демократски процес, се изјаснуваат за една промена. Не гледам со скептицизам. Тие се исправени пред предизвици, но очекувам оптимистички елементи со составувањето на новата влада и политиките што ќе ги градат – како за самата држава, така и за регионот“
Прашан за споредбата меѓу тие процеси со протестите во Албанија, претседателот на парламентот рече дека истото правило важи секаде – гласот на народот треба да се слушне на демократски начин, преку избори. Тој додава дека кога промените се одвиваат низ легитимни процеси без надворешни влијанија и насилство, на новото раздвижување што го носат младите треба да му се даде шанса.
Африм Гаши: Во суштина секаде младите носат позитивни елементи и се склони кон подобрување на односите во во самите држави. Така што, ако ги отстраниме надворешни влијанија, не знам, насилство, кое не е средство што би било легитимно за доаѓање на власт, ако се тече како што треба, секаде каде што младите покренуваат нешто и мнозинството од граѓаните го прифаќаат, треба мислам да дочекаме со оптимизам и да дадеме шанса да се покажат.
360°: Особено ако имаме структури коишто се повеќе од десет, 12 -14 години на власт.
Гаши: Апсолутно, мислам дека Американците тоа најдобро го имаат решено, два мандати мислам дека се најдоволно за една личност да се покаже во една позиција. Сега нормално, не критикувам никаде дали ако се останува подолго на власт, но јасно е дека подолгорочните власти ги трошат самите самите политички елити, од друга страна се акумулира поголемо незадоволство кај граѓаните, и гледате во Албанија на пример тие што протестираат се против целата политичка номенклатура, не се за опозицијата или за власта или за некој политичар, туку се гледа дека има незадоволство и сакаат позитивни промени.