Резултатите од американските среднорочни избори ја зголемија неизвесноста околу изградбата на центри за податоци за вештачка интелигенција. Противниците на нивната изградба предупредуваат и на големата потрошувачка на електрична енергија, која придонесува за зголемување на сметките за струја
Голем пад на акциите ги потресе светските берзи, додека цената на нафтата „брент“ забележа раст од речиси четири отсто, на 98,29 долари за барел, пренесуваат светските медиуми.
Падот на Волстрит избриша околу 2,5 трилиони долари од пазарната вредност на компаниите, а најголем удар претрпеа технолошките акции и компаниите поврзани со изградбата на центри за податоци за вештачка интелигенција.
Индексот СиП 500 падна за 4,4 проценти, „Дау Џонс“ загуби 1.833 поени, односно 3,4 отсто, додека „Насдак“ падна за 5,5 отсто и влезе во зона на корекција.
Во меѓувреме, цената на нафтата „брент“ порасна за 3,9 отсто, на 98,29 долари за барел, надоместувајќи значителен дел од падот од речиси девет проценти претходниот ден. Растот следува во услови на неизвесност околу натамошниот тек на војната со Иран и снабдувањето со енергенти.
Растот на цената на нафтата следува по падот од речиси девет отсто претходниот ден. Пазарите се соочуваат со неизвесност околу натамошниот тек на војната со Иран и безбедноста на снабдувањето со енергенти, особено по извештаите за инциденти со бродови во регионот и загриженоста за поморскиот сообраќај.
Најголем пад на берзите забележаа акциите на компаниите поврзани со вештачката интелигенција и изградбата на центри за податоци.
Акциите на производителот на чипови „Нвидиа“ паднаа за 9,3 отсто, додека Еј-ем-ди загуби 17,3 отсто од вредноста. Пад од 9,8 отсто забележа и „Корвив“, компанија која преку облак-услуги изнајмува пристап до чипови за вештачка интелигенција. Акциите на „Џи Вернова“, компанија која обезбедува енергетска инфраструктура за центрите за податоци, паднаа за 7,5 отсто.
Распродажбата следува по загриженоста на инвеститорите дека изградбата на нови центри за податоци може да забави поради високите трошоци за финансирање, но и поради сомнежите дека акциите на компаниите од секторот за вештачка интелигенција се преценети.
Резултатите од американските среднорочни избори ја зголемија неизвесноста околу изградбата на центри за податоци за вештачка интелигенција. Дел од критиките се однесуваат и на нивната голема потрошувачка на електрична енергија и влијанието врз сметките за струја.
На пазарот на обврзници, приносот на десетгодишните американски државни обврзници се намали на 4,84 отсто, од 4,90 отсто на крајот на претходниот ден.
Намалувањето на приносите се случува во услови на нестабилност на берзите, кога инвеститорите бараат побезбедни вложувања.
Падот на технолошките акции се почувствува и на азиските пазари. Јужнокорејскиот индекс КОСПИ загуби 5,3 отсто, додека јапонскиот Никеи 225 падна за 1,8 отсто. Во Европа, лондонскиот индекс ФТСЕ 100 забележа пад од 0,4 отсто.