Од партијата бараат Владата и Министерството за финансии да објават целосен преглед на државните институции, јавните претпријатија и другите субјекти под државна контрола што имале средства во Алта банка, со точните износи, датумите на отворање на сметките, правната основа и имињата на одговорните лица
Од опозициската Демократска унија за интеграција (ДУИ) бараат Владата и Министерство за финансии да објават колку средства на државните институции и јавните претпријатија се наоѓаат во Алта банка, како и врз основа на кои критериуми бил избран банкарскиот партнер.
Партијата прашува и кој ги одобрил тие одлуки и дали изборот бил направен врз основа на независни финансиски проценки и транспарентни процедури или имало политичко влијание.
„Особено загрижува прашањето колкав дел од јавните средства се наоѓаат во Алта банка и врз основа на кои критериуми институции и јавните претпријатија одлучувале да ги користат нејзините услуги. Кој одлучил, кој ги одобрил тие одлуки и кој ја проценил финансиската изложеност на јавните средства? Дали изборот на банката бил резултат на независни финансиски проценки и транспарентни процедури или постоело политичко влијание врз одлуките на институциите? Дали биле анализирани ризиците поврзани со сопственичката структура на банката? Дали постоеле предупредувања и, доколку постоеле, кој ги добил и како постапил по нив?“,
прашуваат од ДУИ.
Оценуваат дека случајот со Алта банка отвора пошироки прашања за управувањето со јавните средства, финансиската безбедност на државните институции и можната поврзаност меѓу политичките одлуки и банкарските интереси.
Според ДУИ, воведувањето привремена администрација и ограничувањата во располагањето со средствата на банката бараат итно институционално испитување, особено поради неизвесноста со која се соочуваат јавните институции и претпријатија во своето финансиско работење.
ДУИ бара да се испита и дали биле анализирани ризиците поврзани со сопственичката структура на банката, како и дали институциите добиле предупредувања за можни финансиски ризици.
Во соопштението се посочуваат и постапките против сопственикот на матичната банка во Србија и сомневањата за финансиски злоупотреби што се предмет на истрага во таа земја.
Од ДУИ бараат Владата и Министерството за финансии да објават целосен преглед на државните институции, јавните претпријатија и другите субјекти под државна контрола што имале средства во Алта банка, со точните износи, датумите на отворање на сметките, правната основа и имињата на одговорните лица.
Истовремено, бараат Народната банка да ги објасни надзорните постапки и проценките на ризикот, а Јавното обвинителство да испита дали при насочувањето на јавните средства имало незаконски влијанија, злоупотреба на службената положба или конфликт на интереси.
„Прашањето веќе не е само што ќе се случи со Алта банка. Прашањето е дали државата знае колку јавни пари се изложени на ризик, како тие завршиле таму и кој бил должен да ги заштити“,
се вели во партиското соопштение.
Од ДУИ порачуваат дека граѓаните имаат право на целосни информации за случајот со Алта банка и бараат институциите да обезбедат транспарентност и отчетност. Според партијата, евентуалната одговорност треба да се утврди врз основа на документи и факти, а да одговараат и оние што ги донеле одлуките и оние што биле задолжени за надзорот и контролата на ризиците.
Народната банка на Србија во саботата објави дека на Алта банка АД Белград, која е мнозински сопственик на Алта банка АД Битола, ѝ е одземена лиценцата за работа поради значително влошување на финансиската состојба и ризикот од дополнително влошување на ликвидноста.
Поради сопственичката поврзаност, Народната банка на Македонија донесе одлука за воведување привремена администрација во Алта банка АД Битола, како и ограничувања за нејзините корисници.
Со тоа, физичките лица имаат неделен лимит од 10 000 денари за готовински подигања и плаќања со картичка, а внатрешните трансфери кон други физички и правни лица во рамките на банката остануваат неограничени. Правните лица можат да вршат неограничени внатрешни трансфери во рамките на банката, но не можат да префрлаат средства во други банки, ниту да повлекуваат готовина од банкомати или шалтери. Кредитокорисниците треба и натаму навремено да ги исполнуваат своите обврски кон банката.