Собранискиот спикер Африм Гаши и неговата косовска колешка Албулена Хаџиу изразиле уверување дека средбата ќе придонесе за дополнително зајакнување на меѓусебната доверба и за утврдување конкретни можности за продлабочување на соработката
Претседателот на Собранието, Африм Гаши, денеска во Скопје ја пречека и оствари средба со претседателката на косовскиот парламент, Албулена Хаџиу, која престојува во официјална посета на земјава. Хаџиу нагласила дека ова е нејзина прва посета на странска земја по преземањето на функцијата, што, како што оценила, е силна потврда за значењето на одличните билатерални односи и соработка меѓу двете држави.
Гаши на средбата изразил задоволство од посетата на Хаџиу, нагласувајќи ја интензивната динамика во соработката меѓу парламентите на двете земји, за која изразил очекување дека ќе продолжи и во иднина. Истакнал дека Македонија и Косово имаат заедничка визија за мирен, стабилен, безбеден и економски просперитетен регион, интегриран во евроатлантските структури. Во таа насока ја нагласил важноста од продолжување на отворениот дијалог и координација за прашањата од регионално значење.
Хаџиу изразила благодарност што земјава во континуитет го поддржува пристапувањето на Косово кон сите мултилатерални и регионални организации и иницијативи.
„На средбата стана збор и за процесот на европските интеграции, при што соговорниците оценија дека меѓусебната соработка треба да биде насочена кон создавање услови за забрзување на европската интеграција на целиот регион, врз основа на заслугите, исполнувањето на критериумите и доследното спроведување на реформите. Нагласија дека ќе продолжат да ги поттикнуваат контактите меѓу граѓаните, младите, академските заедници и деловните субјекти кои претставуваат важна основа за долгорочно пријателство и партнерство“,
соопштија од собраниската прес-служба.
Гаши и Хаџиу изразиле уверување дека средбата ќе придонесе за дополнително зајакнување на меѓусебната доверба и за утврдување конкретни можности за продлабочување на соработката меѓу двата парламента.